Juz 4

کھانے کی یہ سب چیزیں (جو شریعتِ محمدیۖ میں حلال ہیں) بنی اسرائیل کے لئے بھی حلال تھیں ، سوائے اُن (چیزوں) کے جو (حضرت) یعقوبؑ نے نزولِ تورات سے پہلے (کسی وجہ سے) خود اپنے اوپر حرام کرلی تھی ۔ آپۖ کہہ دیں کہ اگر تم سچے ہو تو تورات لاؤ (اور) اسے پڑھو

پھراس کے بعد بھی جو لوگ اللہ پر جھوٹ باندھیں تو وہی ظالم ہیں

آپۖ کہہ دیں کہ اللہ نے سچ فرمایا ہے ، سو تم (چھوڑو ان تعصبات کو) اور ملتِ ابراہیمؑ کی پیروی کرو جو سیدھی راہ پر چلنے والے تھے ۔ اور ہرگز شرک کرنے والوں میں سے نہ تھے

بے شک (سب سے) پہلا گھر جو لوگوں (کی عبادت) کے لئے بنایا گیا ، وہی ہے جو مکہ میں ہے ۔ برکت والا ہے اور تمام جہان (والوں) کے لئے (سرچشمہءِ) ہدایت ہے

اس میں ؙکھلی نشانیاں ہیں (مثلاً) مقامِ ابراہیم ہَے اور جو اِس (گھر) میں داخل ہو گیا وہ اَمان پا گیا اور لوگوں پر اللہ کا یہ حق ہے کہ جو اِس گھر تک پہنچنے کی استطاعت رکھتا ہو وہ اس کا حج کرے ۔ (یہ اؙسکی نشانیاں ہیں) اور جس نے (اسکے بعد بھی) انکار کیا (تو اللہ کو اُسکی کوئی پروا نہیں کیونکہ) بےشک اللہ سب جہان (والوں) سے بے نیاز ہے

(اِن سے) پوچھیں ۔ اے اہلِ کتاب ! تم اللہ کی آیات کا انکار کیوں کرتے ہو ؟ اور (یاد رکھو) اللہ تمہاری حرکتوں کا مشاہدہ کر رہا ہے

کہہ دیجیئے ۔ اے اہلِ کتاب ! جو شخص ایمان لے آیا ہے تم اُسے اللہ کی راہ سے کیوں روکتے ہو ! چاہتے ہو کہ وہ بھی ٹیڑھی راہ چلے ۔ حالانکہ تم خود (اُسکی راستی کے) گواہ ہو ۔ اور اللہ تمہارے اعمال سے بے خبر نہیں

اے ایمان والو ۔ اگر تم اہلِ کتاب میں سے (کسی) گروہ کی بات مانو گے تو وہ تمہارے ایمان (لانے) کے بعد پھر تمہیں کفر کی طرف لوٹا کر چھوڑیں گے

اور بھلا (اب) تم کس طرح کفر کرو گے ؟ (اور جب کہ) تم وہ (خوش نصیب) ہو کہ تم پر اللہ کی آیات تلاوت کی جاتی ہیں ۔ اور (سب سے بڑی بات یہ ہے کہ) تم میں اُس کے رسول (محمد صلی اللہ علیہ وسلم) موجود ہیں اور جو شخص اللہ (کے دامنِ رحمت) کو مضبوطی سے تھام لیتا ہے تو اؙسے ضرور سیدھی راہ کی طرف ہدایت کی جاتی ہے

اے ایمان والو ۔ اللہ کی ناراضی سے بچو ، جیسا اُس سے بچنے کا حق ہے ۔ اور (خبردار) مرنا تو بس مسلمان ہی مرنا

اور تم سب مل کر اللہ کی رَسی کو مضبوطی سے تھام لو ۔ اور (ہرگز) فرقہ بندی کا شکار نہ ہونا اور اللہ کے اُس احسان کو (بھی) یاد رکھو جو اُس نے تم پر کیا (وہ یہ کہ) جب تم (ایک دوسرے کے) دشمن تھے تو اُس نے تمہارے دلوں میں اُلفت ڈال دی اور تم اُس کے فضل و کرم کے باعث آپس میں بھائی بھائی بن گئے ۔ اور تم آگ کے ایک گڑھے کے بالکل کنارے پر (پہنچ چکے) تھے پھر اؙس نے تمہیں اِس (میں گرنے) سے بچا لیا ۔ اِسی طرح اللہ اپنی آیات کو تمہارے لئے کھول کھول کر بیان کرتا ہے تاکہ تم ہدایت پا جاؤ

اور تم میں سے (لوگوں کی) ایک ایسی جماعت ضرور ہونی چاہئیے جو (لوگوں کو) نیکی کی طرف بلائے اور اچھے کام کرنے کا حکم دے اور ؙبرائی سے روکے اور یہی لوگ فلاح پانے والے ہیں

اور (دیکھو) اُن لوگوں کی طرح نہ ہو جانا جو فرقوں میں بٹ گئے اور روشن نشانیاں آ جانے کے بعد بھی اختلافات میں مبتلا ہو گئے ۔ اور ایسے ہی (ہٹ دھرم) لوگوں کے لئے بہت بڑا عذاب ہے

جس دن (بہت سے) چہرے روشن ہونگے اور (بہت سے) چہرے سیاہ ہوں گے تو جن کے چہرے سیاہ ہوں گے (اُن سے پوچھا جائے گا) کیا تم نے ایمان لانے کے بعد کفر کیا تھا ؟ تو جو کفر تم کرتے رہے تھے ۔ (اس کے بدلے میں) اب اس عذاب (کی اذیتیں) چکھ لو

اور جن لوگوں کے چہرے روشن ہوں گے تو وہ اللہ کی رحمت میں ہوں گے اور وہ اس (رحمت کے سائے) میں ہمیشہ رہیں گے

�ہ اللہ کی آیات ہیں جو ہم آپۖ کو حق کے ساتھ پڑھ کر سناتے ہیں ۔ (وہ اس لئے کہ) اللہ دنیا والوں پر ظلم کرنے کا ارادہ نہیں رکھتا

اور (یاد رکھو) جو کچھ آسمانوں میں ہے اور جو کچھ زمین میں ہے سب اللہ ہی کا ہے اور سارے معاملات اللہ ہی کے حضور لوٹائے جاتے ہیں

(اے ایمان والو ) تم ایک بہترین اُمت ہو جو لوگوں (کی اصلاح و ہدایت) کے لئے نکالی گئی ہو ۔ تم بھلائی کا حکم دیتے ہو اور ؙبرائی سے منع کرتے ہو اور اللہ پر ایمان رکھتے ہو اور اگر اہلِ کتاب بھی ایمان لے آتے تو یقیناً اؙن کے لئے بہتر ہوتا ! اِن میں کچھ ماننے والے بھی ہیں اور اکثریت نافرمانوں کی ہے

(صحابہ کرام کو حوصلہ دیتے ہوئے ارشادِ باری تعالٰی ہے کہ) یہ (اہلِ کتاب یہودی ذہنی) اذیت دینے کے سوا تمھارا کچھ بھی نہیں بگاڑ سکیں گے ۔ اور اگر وہ تمہارے ساتھ جنگ کریں گے تو تمہارے سامنے پیٹھ پھیر کر بھاگ جائیں گے ۔ (اور ایسے بے بس ہو جائیں گے کہ) پھر ان کی مدد بھی نہیں کی جائے گی

وہ جہاں کہیں بھی پائے گئے اُن پر ذلت مسلّط کردی گئی ہے ۔ ہاں البتہ کہیں اللہ کے ذمہ یا انسانوں کے ذمہ میں پناہ مل گئی (تو یہ اور بات ہے) ۔ وہ اللہ کا غضب لے کر لوٹے ہیں اور اُن پر محتاجی مسلّط کر دی گئی ہے یہ اس لئے کہ وہ اللہ کی آیات کا انکار کرتے تھے ۔ اور انبیاء کو ناحق قتل کرتے تھے ۔ کیونکہ وہ نافرمان ہو گئے تھے اور (سرکشی میں) حد سے بڑھ گئے تھے