Juz 6

اللہ بُری بات زبان پر لانے کو پسند نہیں کرتا ہاں مگر مظلوم کو (اجازت ہے کہ وہ اپنے اوپر ہونے والے ظلم کا اعلان کرئے) اور ہاں اللہ تو سنتا بھی ہے (اور) جانتا بھی

اگر نیکی کو ظاہر کرو یا اسے خُفیہ رکھو یا (کسی کی) بُرائی سے درگزر کرو (تو جان لو کہ) بے شک اللہ بھی بہت درگزر فرمانے والا ہے (اوراس کے باوجود) وہ پوری قدرت کا مالک (بھی) ہے

(اور البتہ یہ حقیقت جان لینی چاہئیے کہ) بلا شبہ جو لوگ اللہ اور اُسکے رسولوں کے منکر ہو رہے ہیں اور چاہتے ہیں کہ اللہ اور اُسکے رسولوں کے درمیان تفریق پیدا کریں اور کہتے ہیں کہ کسی کو مانیں گے اور کسی کو نہیں مانیں گے اور چاہتے ہیں کہ اس (ایمان اور کفر) کے درمیان کوئی راستہ نکال لیں

اصل میں یہی لوگ پکّے کافر ہیں اور (ایسے ہی) کافروں کے لئے ہم نے ذلّت آمیزعذاب تیار کر رکھا ہے

اور (اس کے برعکس) جو لوگ اللہ اور اُس کے رسولوں پر ایمان لائے اور وہ اُن میں سے کسی میں بھی فرق نہیں کرتے ہم اؙنہیں ضرور اؙن کے اجرعطا فرمائیں گے اور اللہ تو بہت بخشنے والا ، رحم کرنے والا ہے

(اے رسول صلی اللہ علیہ وسلم) یہ اہلِ کتاب (آج) آپۖ سے یہ مطالبہ کرتے ہیں کہ آسمان سے کوئی لکھی لکھائی کتاب (ایک ہی مرتبہ) نازل کروا دیں ۔ (اس میں حیرت کی کوئی بات نہیں) یہ تو موسیٰ (علیہ السلام) سے اس سے بھی بڑا مطالبہ کر چکے ہیں ۔ وہ یہ کہ اؙنہوں نے کہا تھا کہ اللہ کو (ہماری آنکھوں کے سامنے) کھلم کھلا دکھا دو - تو اُن کی اس سرکشی کی وجہ سے اؙنہیں بجلی کی کڑک نے آپکڑا ۔ پھر اؙنہوں نے بچھڑے کو (اپنا معبود) بنا لیا بعد اس کے کہ اُن کے پاس واضح نشانیاں آچکی تھیں ۔ اس (ظالمانہ فعل) پر بھی ہم نے اُن سے درگزر کیا ۔ اور موسیٰ (علیہ اسلام) کو اُن پر کھلا غَلبہ عطا کر دیا

اور (پھر) ہم نے اُن سے پختہ عہد لینے کے لئے کوہِ طور کو اُن پر اُٹھا دیا ۔ اور ہم نے اُنہیں (متنّبہ کرنے کے لئے) فرمایا کہ (شہر کے) دروازے میں سجدہ ریز ہوتے ہوئے داخل ہونا ۔ اور ہم نے اُنہیں (یہ بھی) فرمایا کہ ہفتے کے دن کے معاملے میں حد سے نہ بڑھنا ۔ (ان سب باتوں پر) ہم نے اُن سے پختہ عہد لیا تھا

(آخرِ کار) اُن کی عہد شکنی کی وجہ سے اور (اس وجہ سے کہ) اُنہوں نے اللہ کی آئیتوں کو جھٹلایا اور (بہت سے) نبیوں کو ناحق قتل کیا (ان وجوہات کی وجہ سے اللہ نے ان پر لعنت بھیج دی) اور اُن کا یہ قول کہ ہمارے دلوں پر تو غلاف چڑھے ہوئے ہیں ۔ (حالانکہ یہ بات نہیں) اللہ نے تو ان کے کفر کی وجہ سے ان کے دلوں پر مہر لگا دی ہے ۔ اس لئے (اب) یہ تھوڑے ہی ایمان لائیں گئے

اور ان کے کفر کی وجہ سے اور مریم (علیہا السلام) پر بہت بڑا بہتان لگانے کی وجہ سے

اوران کے اس دعوے کی وجہ سے کہ ہم نے مسیح عیسیٰ ابنِ مریم (علیہ السلام) کو قتل کر دیا جو کہ اللہ کے رسول ہیں ۔ حالانکہ انہوں نے نہ اُن کو قتل کیا اور نہ ہی اؙنہیں سولی پر چڑھایا ، بلکہ اُن کے لئے (کسی اور کی) وہی شکل بنادی گئی اور جنہوں نے ان کے بارے میں اختلاف کیا وہ یقیناً (اس قتل کے حوالے سے) شک میں پڑے ہوئے ہیں ۔ اؙنہیں اس (حقیقتِ حال) کے بارے میں کچھ بھی علم نہیں وہ تو محض وہم و گمان کے پیچھے پڑے ہوئے ہیں ۔ اور (جان لو کہ) اؙنہوں نے اِنہیں (یعنی عیسیٰ علیہ السلام کو) یقیناً قتل نہیں کیا

بلکہ اللہ ہی نے اؙنہیں اپنی طرف اُٹھا لیا تھا ۔ اور (یہ کام اللہ کے لئے کوئی مشکل نہیں کیونکہ) اللہ زبردست حکمت والا ہے

اور اہلِ کتاب میں سے کوئی بھی شخص ایسا نہ ہوگا مگر یہ کہ وہ اپنی موت سے پہلے ان پر ایمان لے آئے گا ۔ اور قیامت کے دن وہ (یعنی عیسیٰ علیہ السلام) اُن پر گواہ ہوں گے

پھر ان یہودیوں کے ظالمانہ طرزِعمل کی وجہ سے ہم نے ان پر (کئی) پاکیزہ چیزیں حرام کر دیں جو (پہلے) ان پر حلال کی جا چکی تھیں ۔ اور اس وجہ سے بھی) کہ وہ (لوگوں کو) اللہ کی راہ سے (بکثرت) روکتے تھے

اور اس وجہ سے (بھی) کہ وہ سود لیتے تھے حالانکہ اُنہیں اس سے روکا گیا تھا اور (اس کے ساتھ ساتھ) وہ لوگوں کا مال (بھی) نا حق کھاتے تھے ۔ اور جو لوگ ان میں سے کافر ہیں اُن کے لئے ہم نے درد ناک عذاب تیار کر رکھا ہے

لیکن اُن میں سے جو پختہ علم والے ہیں اور مومن بھی ہیں ۔ (تو ایےجبیبۖ) جو آپۖ پر نازل کیا گیا اور جو آپۖ سے پہلے نازل کیا گیا تھا وہ (دونوں پر برابر) ایمان لاتے ہیں اور وہ (احسن طریقے سے) نماز کا اہتمام کرنے والے اور (اللہ کی محبت میں) زکوٰۃ دینے والے ہیں اور (اس کے علاوہ) اللہ اور یومِ آخر پر ایمان رکھنے والے ہیں ۔ یہی وہ (خوش نصیب) لوگ ہیں جنہیں ہم عنقریب بڑا اجر عطا فرمائیں گے

(اے رسولِ کریم صلی اللہ علیہ وسلم) بے شک ہم نے آپۖ کی طرف (اُسی طرح) وحی بھیجی ہے جیسے ہم نے نوح (علیہ السلام) کی طرف وحی بھیجی تھی ۔ اور ان کے بعد (آنے والے دوسرے) انبیاء (کی طرف) ۔ اور ہم نے ابراہیمؑ اور اسماعیلؑ اور اسحاقؑ اور یعقوبؑ اور (ان کی) اولاد اور عیسیؑ اور ایوبؑ اور یونسؑ اور ہارونؑ اور سلیمانؑ (علیم السلام) کی طرف (بھی) وحی بھیجی ۔ اور ہم نے داؤد (علیہ السلام) کو زبور عطا فرمائی

اور (ایسے بھی) رسول ہیں جن کے حالات اس سے پہلے ہم آپۖ سے بیان کر چکے ہیں - اور (ایسے) رسول بھی ہیں جن کا ذکر ہم نے آپۖ کو نہیں سنایا ۔اور اللہ نے موسیٰ (علیہ السلام) سے بطورِ خاص کلام فرمایا

(یہ سب) رسول (ایمان والوں کو) خوشخبری سنانے والے اور (کافروں کو اللہ کے عذاب سے) ڈرانے والے (بنا کر) اس لئے بھیجے تاکہ ان رسولوں کے (آنے کے) بعد لوگوں کے پاس اللہ کے مقابلے میں کوئی عذر باقی نہ رہے ۔ بےشک اللہ زبردست ہے ، بڑی حکمت والا ہے

(ایے حبیبۖ لوگ نہیں مانتے تو نہ مانیں) مگر اللہ گواہی دیتا ہے کہ اُس نے جو کچھ آپۖ پر نازل کیا ہے ، اپنے علم سے نازل کیا ہے اور فرشتے (بھی اسکی) گواہی دیتے ہیں اور (اس پر تو) اللہ کا گواہ ہونا ہی کافی ھے

بے شک جنہوں نے (رسالتِ محمدی صلی اللہ علیہ وسلم کا) انکار کیا اور (لوگوں کو) اللہ کی راہ سے روکا وہ تو دوؙر کی گمراہی میں جابھٹکے