Juz 5

اور وہ عورتیں (بھی تم پر حرام ہیں) جو کسی کے نکاح میں ہوں سوائے اس کے کہ وہ (جنگی قیدی عورتوں کی طرح) تمہاری ملکیت میں آ جائیں ۔ یہ اللہ کا قانون ہے (جس کی پابندی کرنا) تم پر لازم ہے ۔ اور ان کے سوا (سب عورتیں) تمہارے لئے حلال کر دی گئی ہیں تاکہ تم اپنے اموال کے ذریعے پاک دامن رہتے ہوئے (نکاح کی) خواہش کرو ۔ نہ یہ کہ تم صرف نفسانی خواہش پوری کرو ۔ پھر ان میں سے جن سے تم نے اس (مال) کے عوض (ازدواجی زندگی کا) لطف اٹھایا ہے اؙنہیں اُن کا مقرر شدہ مہر فرض سمجھتے ہوئے ادا کرو ۔ اور(البتہ) مہر مقرر کرنے کے بعد آپس کی رضا مندی سے جو کچھ طے کر لو تو اس پر کوئی گناہ نہیں ۔ بلاشبہ اللہ (حالات کے تقاضوں کو) خوب جاننے والا (اور) حکیمانہ فیصلے کرنے والا ہے

اور تم میں سے جو کوئی آزاد مومن عورتوں سے نکاح کرنے کی استطاعت نہ رکھتا ہو تو پس وہ اُن مومن کنیزوں میں سے کسی کے ساتھ نکاح کر لے جو (شرعاً) تمہاری ملکیت میں ہیں ۔ اور اللہ تمہارے ایمان (کی کیفیت) کو خوب جانتا ہے ۔ (حقیقت تو یہ ہے کہ) تم سب ایک دوسرے میں سے ہی ہو (یعنی ایک ہی ماں باپ کی اولاد) - تو اِن (کنیزوں) کے مالکوں کی اجازت سے اُن کے ساتھ نکاح کرو ۔ اور دستور کے مطابق اُن کے مہر ادا کرو ۔ (تا کہ) وہ نکاح میں آ کر پاک دامن رہیں ، نہ کہ وہ کُھلی شہوت رانی کرتی پھریں اور نہ چوری چھپے (غیرمحرموں سے) ملتی رہیں ۔ پھر جب وہ نکاح کر کے پاک دامن بن جائیں تو (اس کے بعد) وہ بدکاری کا ارتکاب کر بیٹھیں تو اُن کے لئے آزاد عورتوں کے لئے (مقرر) سزا سے نصف (سزا) ہو گی ۔ یہ (سہولت) تم میں سے اُن (لوگوں) کے لئے ہے جن کو بدکاری (میں مبتلا ہونے) کا اندیشہ ہو ۔ اور اگر تم صبر کرو (تو یہ) تمہارے لئے بہتر ھے ۔ (پھر بھی اگر کوئی غلطی ہو جاتی ہے تو مطمئن رہو کہ) اللہ بہت مغفرت کرنے والا رحیم ہے

اللہ کا ارادہ ہے کہ وہ تمہارے لئے (اپنے احکامات) کھول کر بیان کر دے اور تمہیں اُن (برگزیدہ) لوگوں کی راہوں پر چلائے جو تم سے پہلے تھے ۔ اور وہ تمہارے اوپر توجہ فرمائے ۔ اور اللہ صاحبِ علم و حکمت ہے

اللہ تو یہی چاہتا ہے کہ تم پر نظرِ کرم فرمائے ، مگر جو لوگ نفسانی خواہشات کی پیروی کرتے ہیں وہ چاہتے ہیں کہ تم (سیدھے راستے سے) بھٹک کر بہت دؙور جا پڑو

اللہ تو (یہ بھی) چاہتا ہے کہ تم پر (بے جا پابندیوں کا) بوجھ ہلکا کر دے اور (حقیقت تو یہ ہے کہ) انسان کو کمزور پیدا کیا گیا ہے

اے ایمان والو - تم ایک دوسرے کے مال آپس میں باطل طریقے سے نہ کھاؤ ، ہاں مگر باہم رضامندی سے کوئی تجارت کرسکتے ہو ۔ اور اپنے آپ کو ہلاکت میں مت ڈالو ۔ یقین کر لو کہ اللہ تم پر بڑا مہربان ہے

اور جو کوئی زبردستی اور حق تلفی (ظلم و زیادتی) کے ساتھ ایسا کرے گا تو ہم اُسے عنقریب (جہنم کی) آگ میں جھونک دیں گے اور (ایسا کرنا) اللہ کے لئے بہت آسان ہے

اگر تم اُن بڑے گناہوں سے بچتے رہو جن سے تمہیں روکا گیا ہے تو ہم تمہاری چھوٹی موٹی برائیوں کو مٹا دیں گے اور تمہیں عزت و اکرام کی جگہ داخل کریں گے

اور تم اؙس (چیز) کی تمنّا نہ کرو جس میں اللہ نے تم میں سے بعض کو بعض پر فضیلت دی ہے ۔ (یہ نظامِ قدرت ہے اور دیکھو) مَردوں کے لئے اُس میں سے حصّہ ہے جو اُنہوں نے کمایا اور عورتوں کے لئے اُس میں سے حصّہ ہے جو اؙنہوں نے کمایا ۔ اور (دوسروں کو دیکھ کر کُڑھنے کی بجائے) اللہ سے اُس کا فضل مانگو ، یقیناً وہ ہر چیز کے بارے میں خوب علم رکھتا ہے

اور ہم نے ماں باپ اور قریبی رشتہ داروں کے چھوڑے ہوئے (مال) میں سب کے لئے وارث مقرر کر دیئے ہیں ۔ اور جن سے تمہارا معاہدہ ہو چکا سو اؙنہیں اؙن کا حصہ دے دو ۔ بے شک اللہ ہر چیز پر نگاہ رکھے ہوئے ہے

مَرد عورتوں پر محافظ و نگران ہیں ، اِس لئے کہ اللہ نے ان میں سے بعض کو بعض پر فضیلت دی ہے ۔ اور اس بنا پر بھی کہ مَرد (ان پر) اپنے مال خرچ کرتے ہیں ۔ پس جو نیک عورتیں ہیں وہ (اپنے خاوندوں کی) فرماں بردار ہوتی ہیں ، (اؙن کی) عدم موجودگی میں اللہ کی حفاظت کے ساتھ (اپنے خاوندوں کے رازوں اور اپنی عزت وناموس کی) حفاظت کرنے والی ہوتی ہیں ۔ (ہاں البتہ) جن عورتوں سے تمہیں سرکشی کا اندیشہ ہو اؙنہیں سمجھاؤ اور (اگر وہ نہ سمجھیں تو) اؙنہیں خواب گاہوں میں (اپنے سے) الگ کر دو۔ اور (اگر اس پر بھی وہ نہ مانیں تو) اؙنہیں (ہلکی ؙپھلکی) سزا دو - پھر اگر وہ تمہاری بات مان لیں تو (خوامخواہ) اُن پر (ظلم کا) کوئی راستہ تلاش نہ کرو ۔ (یہ بات ذہن نشین رہے کہ) اللہ سب سے بالا تر (اور) بڑا ہے

اور اگر (اس کے بعد بھی) تمھیں ان دونوں (یعنی میاں بیوی) کے درمیان مخالفت کا اندیشہ ہو تو ایک ثالث اس (مرد) کے خاندان سے اور ایک ثالت اُس (عورت) کے خاندان سے مقرر کر لو ۔ اگر وہ دونوں اصلاح چاہیں گے تو اللہ ان دونوں کے درمیان موافقت پیدا کردے گا ، بلاشبہ اللہ (ہر چیز کا) علم رکھنے والا باخبر ھے

اور تم (سب) اللہ کی عبادت کرو اور اُس کے ساتھ کسی چیز کو بھی شریک نہ ٹھہراو اور ماں باپ کے ساتھ بھلائی کرو ۔ اور رشتہ داروں اور یتیموں اور محتاجوں (کے ساتھ حُسنِ سلوک سے پیش آؤ) اور نزدیکی ہمسائے اور اجنبی ہمسائے اور ہم نشین اور مسافروں اور (اؙن غلاموں اور کنیزوں کے ساتھ) جو تمہاری ملکیت میں ہوں (احسان کا معاملہ رکھو) ۔ بے شک اللہ غرور کرنے والے (اور) شیخی بگھارنے والے (شخص) کو پسند نہیں کرتا

وہ جو (خود بھی) کنجوسی کرتے ہیں اور لوگوں کو (بھی) بُخل کا حکم دیتے ہیں اور اُس (نعمت) کو چھپاتے ہیں جو اللہ نے اؙنہیں اپنے فضل سے عطا کی ۔ اور ایسے نا شکرگزاروں کے لئے ہم نے ذلیل کر دینے والا عذاب تیار کر رکھا ہے

(اور اللہ کے ناپسندیدہ لوگوں میں وہ بھی ہیں) جو اپنے مال دکھاوے کے لئے خرچ کرتے ہیں اور (حقیقت میں) وہ نہ تو اللہ پر ایمان رکھتے ہیں اور نہ آخرت کے دن پر ۔ (شیطان اُن کا ساتھی ہے) اور شیطان جس کا بھی ساتھی بن گیا تو وہ بہت ہی بُرا ساتھی ہے

اور اؙن کا کیا جاتا اگر وہ اللہ اور یومِ آخرت پر ایمان لے آتے ! اور جو کچھ (رزق) اللہ نے اؙنہیں دیا تھا اُس میں سے (اللہ کی راہ میں) خرچ کرتے !! اور اللہ اِن کے (کرتوتوں کے) بارے میں خوب جانتا ہے

بے شک اللہ ذرّہ برابر بھی ظلم نہیں کرتا اور اگر (کسی کی) ایک نیکی ہو تو وہ اُسے دو چند کر دیتا ہے اور اپنی طرف سے بھی بڑا اجر عطا فرما تا ہے

(ذرا سوچو تو !) پھر (اُس دن اؙن لوگوں کا) کیا حال ہوگا جب ہم ہر اُمت سے ایک گواہ لائیں گئے اور (اے پیغمبرِ آخر الزّماں صلی اللہ علیہ وسلم) ہم آپۖ کو اِن سب پر گواہ لائیں گے

اؙس دن وہ لوگ جو (دنیا میں) کفر کرتے رہے اور رسول (صلی اللہ علیہ وسلم) کی نافرمانی کرتے رہے یہ آرزو کریں گے کہ کاش (زمین پھٹ جائے وہ اس میں سما جائیں اور) زمین اُن پر برابر کر دی جائے اور (وہاں) وہ (اپنی کوئی) بات بھی اللہ سے چھپا نہ سکیں گے

اے ایمان والو ! تم نشہ کی حالت میں نماز کے قریب نہ جاؤ یہاں تک کہ تم جان لو جو (نماز میں) کہتے ہو ۔ (اِسی طرح) جنابت کی حالت میں بھی (نماز نہ پڑھو) حتٰی کہ غسل کر لو ۔ ہاں البتہ راستے (یا مسجد) سے گزرنا ہو (تو کوئی حرج نہیں) ۔ اور اگر تم بیمار ہو یا سفر میں ہو یا تم میں سے کوئی رفع حاجت سے واپس آئے یا تم نے (اپنی) عورتوں سے مباشرت کی ہو (اور) پھر پانی نہ پا سکو تو پاک مٹی سے تیممّ کر لو ۔ پس اپنے چہروں اور ہاتھوں پر مسح کر لیا کرو ۔ (یہ اللہ نے تمہیں سہولت دی ہے) بے شک اللہ درگزر کرنے والا ، بخشنے والا ہے