Juz 8

اور اگر ہم ان پر فرشتے بھی اُتار دیتے اور مُردے (قبروں سے اُٹھ کر) اُن سے باتیں کرنے لگتے اور ہم (دنیا بھر کی) تمام چیزوں کو اُن کے رُوبرو جمع کر دیتے ، تب بھی وہ ایمان لانے والے نہ تھے ۔ سوائے اس کے کہ اللہ کی مرضی ہوتی (کہ وہ ایمان لے آئیں) لیکن ان میں سے اکثر جہالت کی باتیں کرتے ہیں

اور اِسی طرح ہم نے ہر نبی کے لئے انسانوں اور جنّوں میں سے شیطانوں کو دشمن بنا دیا جو چکنی چپڑی باتیں فریب کے طور پر ایک دوسرے کے دلوں میں چپکے چپکے ڈالتے رہتے ہیں ۔ اور اگر آپۖ کا رب چاہتا تو وہ ایسا ہرگز نہ کر پاتے ۔ پس آپۖ انہیں (ان کے حال پر) چھوڑ دیں ۔ اور (اُسے بھی) جو بہتان وہ باندھ رہے ہیں

(ہم اُنہیں یہ سب کچھ اس لئے کرنے دے رہے ہیں کہ) جو لوگ آخرت پر ایمان نہیں رکھتے اُن کے دل اس (خوشنما دھو کے) کی طرف مائل ہو جائیں اور وہ اس سے راضی (بھی) ہو جائیں اور (اؙن برائیوں کا) ارتکاب کریں جن کے وہ خود مرتکب ہو رہے ہیں

پھر جب حال یہ ہے تو اے محمد صلی اللہ علیہ وسلم ان سے ذرا پو چھئے))تو کیا میں اللہ کے سوا کوئی اور فیصلہ کرنے والا تلاش کروں ، حالانکہ وہ (اللہ) ہی ہے جس نے تمہاری طرف تفصیل کے ساتھ کتاب نازل کر دی ہے ۔ اور (رہے) وہ لوگ جنہیں ہم نے (پہلے) کتاب دی تھی ، وہ (اچھی طرح) جانتے ہیں کہ بے شک یہ (قرآن) آپۖ کے رب کی طرف سے برحق نازل کیا گیا ہے ۔ پس آپۖ تردّد کرنے والوں میں سے نہ ہونا

اور آپۖ کے رب کی بات سچائی اور انصاف کے اعتبار سے پوری ہو چکی (اور سن لو) اؙس کی باتوں کو کوئی بدلنے والا نہیں اور وہ خوب سننے والا ، جاننے والا ہے

اور اگر آپۖ زمین میں (موجود) لوگوں کی اکثریت کا کہا مان لیں تو وہ آپۖ کو اللہ کی راہ سے ہٹا دیں گے ۔ وہ تو صرف وہم و گمان کے تابع ہیں اور محض قیاس آرائیاں کرتے رہتے ہیں

بے شک آپۖ کا رب خوب جانتا ہے جو اُسکی راہ ہٹا ہُوا ہے اور وہی ہدایت یافتہ لوگوں سے (بھی) خوب واقف ہے

پھر اگر تم (لوگ) اللہ کی آیات پر ایمان رکھتے ہو تو اس (ذبیحہ) سے کھایا کرو جس پر (ذبح کرتے وقت) اللہ کا نام لیا گیا ہو

اور تمہیں کیا ہے کہ تم وہ (چیز) نہ کھاؤ جس پر اللہ کا نام لیا گیا ہو ۔ حالانکہ جو کچھ حالتِ اضطرار کے سوا (دوسری تمام حالتوں میں اللہ نے) تم پر حرام کر دیا ہے تمہارے لئے اؙن کی تفصیل (پہلے) بیان کی جا چکی ھے ۔ حقیقت تو یہ ہے کہ بہت سے لوگ بے علمی کے باعث اپنی خواہشات کی بنا پر(دوسروں کو) گمراہ کرتے ہیں ۔ بے شک آپۖ کا رب ان حد سے بڑھنے والوں کو خوب جانتا ہے

(اے لوگو) وہ گناہ جو تم سب کے سامنے کرتے ہو اور جو چھپ کر کرتے ہو(دونوں کو) چھوڑ دو ۔ (اور یاد رکھو) جو لوگ گناہ کا اکتساب کرتے ہیں عنقریب وہ اپنی اس کمائی کا بدلہ پا کر رہیں گے

اور جس (جانور) پر ( ذبح کرتے ہوئے) اللہ کا نام نہ لیا گیا ہو (اُس کا گوشت) مت کھاؤ اور بے شک (اُس کا کھانا) گناہِ کبیرہ ہے اور بے شک شیاطین اپنے ساتھیوں کے دلوں میں (وسوسے) ڈالتے ہیں تاکہ وہ تم سے جھگڑا کریں اور اگر تم (لوگوں) نے اُن کا کہنا مان لیا تو تم یقیناً مشرک ہو جاؤ گے

کیا وہ (شخص) جو پہلے مُردہ تھا (حیاتِ ایمان سے محروم) پھر ہم نے اُسے زندگی بخشی (یعنی روحِ ہدایت عطا فرمائی) اور اُس کے لیے (ایمان و معرفت کا) وہ نُور پیدا فرمایا جس کے اؙجالے میں وہ لوگوں کے درمیان چلتا پھرتا (عوام کی راہنمائی کرتا) ہے ۔ تو کیا وہ اُس (شخص) کی مانند ہو سکتا ہے جو (جہالت و گمراہی کے) اندھیروں میں (گرا) پڑا ہے اور کسی طرح بھی ان سے نکلنے والا نہیں ۔ اِسی طرح کافروں کے لئے وہ اعمال خوشنما بنا دیئے گئے جو وہ کرتے ہیں

اور اسی طرح ہم نے ہر بستی میں (وہاں کے) وڈیروں کو (اُن کا ہٹ دھرمی اور تکبر کی وجہ سے) جرائم میں ملوث کر دیا کہ وہ اس میں اپنے مکر و فریب کا جال بچھائیں ۔ (حقیقت تو یہ ہے کہ) وہ اپنے آپ کو ہی فریب دے رہے ہیں ۔ مگروہ (اس حقیقت کو) سمجھتے نہیں

اور جب اُن کے پاس کوئی نشانی آتی تو کہتے ہم ہرگز ایمان نہیں لائیں گے یہاں تک کہ ہمیں بھی ویسی ہی (نشانی) دی جائے جیسی اللہ کے رسولوں کو دی گئی ۔ اللہ خوب جانتا ہے کہ رسالت کا حق دار کسے بنایا جائے ۔ عنقریب ایسے مجرموں کو اپنی مکاریوں کے بدلے اللہ کی طرف سے ذلّت و رسوائی اور سخت عذاب پہنچے گا

پس اللہ جس (خوش نصیب) کو(اس کی نیک نیتی کی وجہ سے) ہدایت دینے کا ارادہ فرماتا ہے تو اُس کا سینہ اسلام کے لئے کھول دیتا ہے اور جسے (اؙسکی بدنیتی کی وجہ سے) گمراہ کرنے کا ارادہ کرتا ہے تو اس کا سینہ (ایسی) شدید گھٹن کے ساتھ تنگ کر دیتا ہے کہ جیسے وہ بمشکل بلندی کی طرف چڑھ رہا ہو ۔ اسی طرح الله اؙن لوگوں پر (کفر کی) گندگی ڈال دیتا ہے جو ایمان نہیں لاتے

اور (اے میرے حبیبۖ) یہ ہے راستہ آپۖ کے رب کا سیدھا (راستہ) اور (اس راستے کے) نشانات اُن لوگوں کے لئے واضح کر دیئے گئے ہیں جو نصیحت قبول کرتے ہیں

اُن کے لئے اُن کے رب کے پاس سلامتی کا گھر (یعنی جنت) ہے اور وہی اُن کا سرپرست ہے ۔ اُن (صالح) اعمال کے باعث جو وہ انجام دیا کرتے تھے

اور جس دن وہ ان سب کو جمع کرے گا (اور فرمائے گا) اے جنّوں کے گروہ ! تم نے (انسانوں کو بہکا کر) ان سے بہت سے فائدے حاصل کئے ۔ (یہ سن کر) انسانوں میں سے جو ان (شیاطین) کے ساتھی تھے وہ کہیں گے ، اے ہمارے رب ہم نے ایک دوسرے سے (خوب) فائدے حاصل کئے اور (اسی مفاد پرستی اور دنیاوی حرص و ہوا میں مبتلا) اب اُس وقت پر آپہنچے جو تُو نے ہمارے لئے مقرر کر دیا تھا ۔ (اللہ) فرمائے گا (اب) آگ ہی تمہارا ٹھکانا ہے ۔ ہمیشہ اسی میں (جلتے) رہو گے مگر جِسے اللہ (بچانا) چاہے ۔ بے شک آپۖ کا رب بڑی حکمتوں کا مالک ، سب کچھ جاننے والا ہے

اور اِسی طرح ہم ظالموں کو ایک دوسرے پر مسلّط کرتے رہتے ہیں اُن (کرتوتوں) کی وجہ سے جو وہ کرتے رہتے ہیں

اس موقع پر اللہ تعالےٰ اُن سے یہ بھی سوال کرے گا کہ) "اے گروہ جن و انس ! کیا تمہارے پاس تمہی میں سے رسول نہیں آئے تھے ؟ جو تمہارے سامنے میری آئتیں بیان کرتے تھے اور تمہیں اس دن کی پیشی سے ڈراتے تھے ؟ "وہ کہیں گے ۔ "ہم اپنے خلاف خود گواہی دیتے ہیں" ۔ اور اؙنہیں دنیا کی زندگی نے دھوکے میں ڈال رکھا تھا ۔ اور (اُس وقت) اؙنہوں نے خود اپنے خلاف گواہی دی کہ وہ کافر تھے