Surah Aal-E-Imran

الف لام میم

اللہ ، اُس کے سوا کوئی (بھی) الٰہ (یعنی عبادت کے لائق) نہیں ۔ ہمیشہ زندہ رہنے والا ہے (اور اپنی قوت کے ساتھ کل کائنات کو) قائم رکھنے والا ہے

(اے میرے رسولۖ) اُسی نے آپۖ پر یہ کتاب حق کے ساتھ نازل فرمائی ہے ، جو تصدیق کرنے والی ہے اُن (سب کتابوں) کی جو اس سے پہلے موجود ہیں اور اُسی نے توریت اور انجیل نازل کی ہے

ماشاءاللہ تین پارے مکمل ہو گئے ہیں لن تنالو پارہ نمبر

�قیناً زمین و آسمان کی کوئی چیز (بھی) اللہ سے پوشیدہ نہیں

وہی تو ہے (تمہارا خالقِ حقیقی) جو (ماؤں کے) پیٹ میں جس طرح چاہتا ہے تمہاری صورتیں بناتا ہے ۔ اُس کے سوا کوئی بھی لائقِ عبادت نہیں ۔ (وہ) بڑا زبردست ، حکمت والا ہے

(اے حبیبۖ) وہ (اللہ) ہی تو ہے جس نے آپۖ پر کتاب نازل فرمائی جس میں مُحکم (یعنی واضح) آیات ہیں جو کتاب کی اصل بنیا د ہیں ۔ اور دوسری متشابہات ہیں ۔ تو جن لوگوں کے دلوں میں ٹیڑھا پن ہے وہ فتنے کی تلاش میں ہمیشہ متشابہات کے پیچھے پڑے رہتے ہیں اور اُن کو (اپنی مرضی کے) معانی پہنانے کی کوشش کرتے رہتے ہیں ۔ (حالانکہ) ان کے حقیقی مفہوم کو اللہ کے سوا کوئی نہیں جانتا ۔ مگر جو پختہ علم والے ہیں وہ توبس یہی کہتے ہیں کہ ان پر ہمارا ایمان ہے ۔ یہ سب (آیات) ہمارے رب کی طرف سے ہیں اور(سچی بات تو یہ ہے کہ) نصیحت توبس عقل والے ہی قبول کرتے ہیں

(اور وہ دعا کرتے ہیں) اے ہمارے پالنے والے - تُو نے ہمیں ہدایت بخشی ہے ۔ تُو اب ہمارے دلوں کو ٹیڑھا نہ کرنا اور ہمیں خاص اپنی طرف سے رحمت عطا فرمانا ، بے شک تو بہت عطا کرنے والا ہے

اے ہمارے رب ! بلاشبہ تُو سب لوگوں کو ایک ایسے دن جمع کرنے والا ہے جس میں کوئی شک و شبہ نہیں ۔ بے شک اللہ وعدہ خلافی نہیں کرتا

بے شک جن لوگوں نے (اس کتاب یعنی قرآن مجید کا) انکار کیا ، (جب کہ اُن پر حُجّت بھی پوری ہوگئی) تو اُن کے مال اور اُن کی اولاد اللہ کے مقابلے میں اُن کے کچھ بھی کام نہ آئیں گے ، اور وہی لوگ دوزخ کا ایندھن بن کر رہیں گے

اُن کا حال بھی وہی ہے جو فرعونیوں اور اُن سے پہلے لوگوں کا تھا ، جنہوں نے ہماری آئیتوں کو جھٹلایا تو اللہ نے اُنہیں اُن کے گناہوں کی وجہ سے پکڑلیا ۔ اور اللہ سخت سزا دینے والا ہے

(اے میرے رسولۖ جنہوں نے آپۖ کی دعوت قبول کرنے سے انکار کر دیا ہے) اُن کافروں سے کہہ دو کہ عنقریب تم (اُسی طرح) مغلوب کئے جاؤ گے اور جہنم کی طرف اکٹھے کئے جاؤ گے اور وہ کیا ہی بُرا ٹھکانا ہے

تحقیق تمہارے لئے اُن دو گروہوں میں (عبرت کا) نشان تھا ۔ جو (میدانِ بدر میں) ایک دوسرے سے مدِّ مقابل ہوئے ۔ ایک گروہ اللہ کی راہ میں لڑ رہا تھا اور دوسرا گروہ کافر تھا (جوشیطان کی راہ میں لڑرہا تھا) ۔ وہ اُنہیں (یعنی مسلمانوں کو) کُھلی آنکھوں ، اپنے سے دوگنا دیکھ رہے تھے ۔ (حقیقت یہی ہے کہ) اللہ (اِسی طرح) جس کی چاہتا ہے اپنی تائید سے مدد فرماتا ہے ۔ بےشک اِس (واقعہ) میں صاحبانِ بصیرت کے لئے سامان عبرت ہے

لوگوں کے لئے خواہشات کی محبت (خُوب) آراستہ کردی گئی ہے (جن میں) عورتیں اور بیٹے اور سونے اور چاندی کے جمع کئے ہوئے خزانے اور نشان زدہ (خوبصورت) گھوڑے اور مویشی اور کھیتی باڑی (سب شامل ہیں) ۔ یہ تو (چند روزہ) دنیاوی زندگی کا سامان ہے ۔ (حقیقت میں) جو بہتر ٹھکانہ ہے وہ تو اللہ ہی کے پاس ہے

(اے میرے رسولۖ) آپۖ (اِنہیں) کہہ دیں ، کیا میں تمھیں ان سب سے بہتر (نعمتوں) کی خبر دوں ؟ جو اہلِ تقوٰی کے لئے اُن کے رب کے پاس ہیں ۔ (وہ یہ ہیں) ایسے باغات جن کے نیچے نہریں بہتی ہوں گی وہ ان میں ہمیشہ رہیں گے (وہاں اُن کے لئے) پاکیزہ بیویاں ہوں گی اور (سب سے بڑی بات یہ کہ) اللہ کی طرف سے رضا و خوشنودی (نصیب ہوگی) اور اللہ اپنے بندوں پر خوب نظر رکھے ہوئے ہے

�ہ وہ (خوش نصیب) لوگ ہیں جو التجا کرتے رہتے ہیں ، اے ہمارے پالنے والے ۔ یقیناً ہم ایمان لے آئے ہیں ۔ پس تو ہمارے گناہوں کو بخش دے اور ہمیں عذاب دوزخ سے بچالے

(یہ مصیبتوں میں) صبر کرنے والے اور (ہر حال میں) سچ بولنے والے اور (عبادت میں) عاجزی کرنے والے اور (اللہ کی راہ میں) خرچ کرنے والے اور سحری کے وقت (اپنے گناہوں کی) معافی مانگنے والے ہیں

اللہ نے خود اس بات کی شہادت دی کہ یقیناً اُس کے سوا کوئی عبادت کے لائق نہیں اور (یہی گواہی دی) فرشتوں اور اہلِ علم نے بھی ۔ کہ وہ انصاف پر قائم ہے ، اُس (اللہ) کے سوا کوئی معبود نہیں جو غالب حکمت والا ہے

�قیناً دین تو اللہ کے نزدیک (صرف) اسلام ہی ہے ۔ اور اہلِ کتاب نے اپنے پاس علم آ جانے کے بعد جو اختلاف کیا وہ صرف باہمی ضد کی بنا پر تھا اور جو کوئی اللہ کی آئیتوں کا انکار کرے تو یقیناً (جان لو کہ) اللہ بہت جلد حساب لینے والا ہے

(اے میرے حبیبۖ) اگر پھر بھی (یہ لوگ) آپۖ سے جھگڑا کریں ۔ تو اُن سے کہیں کہ مَیں نے اور جس نے (بھی) میری اتباع کی (سب نے) اللہ کے حضور سرِ تسلیم خم کر دیا ہے ۔ اور آپۖ اہلِ کتاب اور اَن پڑھ لوگوں سے پوچھیں ۔ کہ کیا تم بھی اسلام قبول کرتے ہو ؟ پھر اگر وہ مسلمان ہو جائیں تو وہ (حقیقتاً) ہدایت پاگئے اور اگر وہ منہ پھیر لیں تو (کوئی بات نہیں) آپۖ کے ذمے تو بس (حُکم) پہنچا دینا ہی تو ہے ۔ اور اللہ اپنے بندوں کو خوب دیکھنے والا ہے