Surah Al-A'raf

اللہ کے نام سے (شروع کیا جاتا ہے) جو نہایت مہربان ہمیشہ رحم فرمانے والا ھے ۔الف لام میم صاد

�ہ ایک کتاب ہے جو آپۖ کی طرف نازل کی گئی ہے ۔ تو (اے میرے رسولۖ) آپۖ کے (منور) سینے میں اس (کی تبلیغ پر کفار کے انکار یا تکذیب کے خیال) سے کوئی رکاوٹ پیدا نہ ہونے پائے ۔ (یہ اس لئے نازل کی گئی ہے) کہ آپۖ اس کے ذریعے (منکروں کو اللہ کے عذاب سے) ڈرائیں ۔ اور ایمان والوں کے لئے یہ ایک نصیحت ہے

(لوگو) جو کچھ تمہارے ربّ نے (قرآن کی صورت میں) تم پر نازل کیا ہے اُس کی پیروی کرو اور اس کے سوا (دوسرے) سر پرستوں کے پیچھے مت چلو ۔ بہت ہی تھوڑے ہو تم جو نصیحت قبول کرتے ہو

اور کتنی ہی بستیاں (ایسی) تھیں جنہیں ہم نے ہلاک کر ڈالا ۔ سواؙن پر ہمارا عذاب (اچانک) رات کے وقت آیا یا (دن دھاڑے ایسے وقت) جبکہ وہ دوپہر کوآرام کر رہے تھے

پھر جب اُن پر ہمارا عذاب آگیا تو اُن کی چیخ و پکار اس کے سوا اور کچھ نہ تھی کہ بے شک ہم ہی ظالم تھے

پھر ہم اُن لوگوں سے ضرور پوچھیں گے جن کی طرف (رسول) بھیجے گئے اور ہم یقیناً رسولوں سے بھی دریافت کریں گے (کہ دعوت و تبلیغ کا کیا ردِّ عمل رہا؟)

پھر ہم ان کے سامنے پورے علم کے ساتھ (ان کے) سب حالات بیان کر دیں گے اور ہم کہیں غائب تو نہیں تھے (کہ انہیں دیکھتے نہ ہوں)

اور اُس دن اعمال کا تولا جانا ایک حقیقت ہوگی ۔ تو جن کے (نیکیوں کے) پلڑے بھاری ہوں گے تو وہی لوگ کامیاب ہوں گے

اور جن کے (نیکیوں کے) پلڑے ہلکے ہوں گے تو یہی وہ لوگ ہیں جنہوں نے اپنی جانوں کو خسارے میں رکھا ، اس وجہ سے کہ وہ ہماری آئتوں کی حق تلفی کیا کرتے تھے

بے شک ہم نے تمہیں زمین میں اختیارات و اقتدار کے ساتھ بسایا ۔ اور تمہارے لئے روزی کمانے کے سارے سامان پیدا کئے ۔ (مگر) تم بہت کم ہو جو شکر ادا کرتے ہو

اور بے شک ہم نے تمہاری تخلیق کی (ابتداء کی) پھر تمہاری شکل و صورت بنائی ۔ پھر ہم نے فرشتوں سے فرمایا آدمؑ کو سجدہ کرو ۔ تو ابلیس کے سوا سب نے سجدہ کیا ۔ وہ سجدہ کرنے والوں میں شامل نہ ہوا

(اللہ تعالٰے نے) پوچھا - (اے ابلیس) تجھے کس (بات) نے روکا کہ تُو سجدہ نہ کرے جبکہ مَیں نے تمہیں (سجدہ کرنے کا) حکم دیا تھا ؟ ۔ (ابلیس) بولا - مَیں اس (آدم) سے بہتر ہوں ۔ (کیونکہ) تُو نے مجھے آگ سے پیدا کیا اور اِسے گارے سے بنایا ہے

اللہ نے فرمایا (اچھا یہ بات ہے) توپھر یہاں سے نیچے اُتر جا ۔ تجھے کوئی حق نہیں پہنچتا کہ تُو یہاں تکبر کرے ۔ پس (میری بارگاہ سے) نکل جا ۔ درحقیقت تُو ذلیل و خوار لوگوں میں سے ہے

بولا – مجھے اُس دن تک (زندہ رہنے کی) مُہلت دے جب کہ (یہ سب) دوبارہ اُٹھائے جائیں گے

(اللہ نے) فرمایا ۔ جن کو مہلت دی گئی تُو اؙنہی میں سے ہے

بولا – (اچھا تو) جس طرح تُو نے مجھے گمراہی میں مبتلا کیا ہے ، میں اب تیری سیدھی راہ پر اِن (انسانوں) کی گھات میں ضرور بیٹھوں گا

آگے اور پیچھے اور دائیں اور بائیں (ہر طرف سے) اِن کو گھیروں گا اور تُو ان میں سے اکثریت کو شکر گزار نہ پائے گا

فرمایا – نکل جا یہاں سے ذلیل و مردوؙد - اِن میں سے جس نے بھی تیری پیروی کی ، تو میں لاﺰماً تجھ سمیت ان سب سے جہنم کو بھر دوں گا

اور اے آدمؑ ! تم اور تمہاری بیوی (دونوں) اِس جنت میں رہو ۔ سو تم دونوں جہاں سے جو چاہو کھاؤ اور (بس) اس درخت کے پاس مت جانا ورنہ تم دونوں حد سے تجاوز کرنے والوں میں سے ہو جاؤ گے

پھر شیطان نے ان دونوں (کے دلوں) میں وسوسہ ڈالا تا کہ اؙن کی شرم گاہیں جو اؙن کی نظروں سے پوشیدہ تھیں اؙن پر ظاہر کر دے اور کہنے لگا (اے آدم و حوّا) تمہارے رب نے تمہیں جو اس درخت سے روکا تھا یہ صرف اس لئے کہ کہیں تم فرشتے نہ بن جاؤ یا تم ہمیشہ زندہ رہنے والوں میں سے نہ ہو جاؤ