Surah Ash-Shuraa

حامیم

عین سین قاف ۔ (حقیقی معنی اللہ اور رسولۖ ہی بہتر جانتے ہیں)

اِسی طرح (اے رسولِ کریم صلی اللہ علیہ وسلم) آپۖ کی طرف اور اُن (رسولوں) کی طرف جو آپۖ سے پہلے ہوئے ہیں ، اللہ وحی بھیجتا رہا ہے ۔ جو غالب ہے ، بڑی حکمت والا ہَے

اُسی کا ہے جو کچھ آسمانوں میں ہے اور جو کچھ زمین میں ہَے اور وہ بلند مرتبہ ، بڑی عظمت والا ہے

قریب ہے کہ (جلالِ الٰہی سے) آسمان اپنے اؙوپر سے پھٹ پڑیں ۔ اور (ایسا اسلئے نہیں ہوتا کہ) فرشتے اپنے رب کی حمد کے ساتھ تسبیح کرتے رہتے ہیں اور زمین میں بسنے والوں کے لئے معافی طلب کرتے رہتے ہیں ۔ خوب جان لو کہ بے شک اللہ ہی مغفرت کرنے والا ، رحم فرمانے والا ہے

اور جن لوگوں نے اُس (اللہ) کے سوا دوسرے کارساز و سرپرست بنا رکھّے ہیں وہ سب اللہ کی نظر میں ہیں ۔ اور (ایے حبیبۖ) آپۖ ان کے ذمہ دار نہیں ہیں

اور اِسی طرح ہم نے (یہ) قرآن آپۖ کی طرف عربی زبان میں وحی فرمایا ہے ۔ تاکہ آپۖ بڑے شہر (مکہ کے رہنے) والوں کو اور اُن لوگوں کو جو اس کے اِرد گرد رہتے ہیں خبردار کر دیں ۔ اور اُس دن کا بھی خوف دلائیں جس (کے آنے) میں کوئی شک نہیں ۔ (اؙس دن) ایک گروہ جنت میں ہوگا اور ایک گروہ بھڑکتی آگ میں ہوگا

اور اگر اللہ چاہتا تو ان سب کو ایک ہی اُمت بنا دیتا ۔ لیکن وہ جسے چاہتا ہے اپنی رحمت میں داخل فرماتا ہے ۔ اور ظالموں کے لئے نہ کوئی دوست ہو گا اور نہ کوئی مددگار

کیا اؙنہوں نے اللہ کے سوا دوسرے کارساز بنا رکھے ہیں ؟ حالانکہ کارساز تو اللہ ہی ہے ۔ اور وہی مُردوں کو زندہ کرتا ہے اور وہی ہر چیز پر پوری طرح قادر ہَے

اور تم جس (امر) میں اختلاف کرتے ہو تو اس کا فیصلہ اللہ ہی کی طرف (سے) ہوگا ۔ یہی اللہ میرا رب ہے ۔ میں نے اِسی پر بھروسہ کیا اور اسی کی طرف رجوع کرتا ہوں

(وہی ہے تمہارا معبودِ حقیقی جو) آسمانوں اور زمین کو عدم سے وجود میں لانے والا ہے ۔ اُسی نے تمہارے لئے تمہاری ہی جنس سے جوڑے بنائے اور چوپائیوں کے بھی (جوڑے بنائے) ۔ اور تمہیں انہی (جوڑوں کی وجہ) سے پھیلاتا ہے ۔ (کائنات کی) کوئی چیز اؙس کے مثل نہیں ۔ اور وہی سننے والا ، دیکھنے والا ہے

آسمانوں اور زمین کے خزانوں کی کنجیاں اُسی کے قبضہ میں ہیں ۔ وہ جس کے لئے چاہتا ہے رزق کشادہ کر دیتا ہے اور (جس کے لئے چاہتا ہے ) نپا تُلا دیتا ہے ۔ بے شک وہ (ہر ایک کے حالات سے) بخوبی واقف ہے

اُس نے تمہارے لئے دین کا وہی راستہ مقرر کیا ہے جس کا حکم اُس نے نوحؑ کو دیا تھا ۔ اور جسے (اے محمد صلی اللہ علیہ وسلم اَب) آپۖ کی طرف وحی کے ذریعے بھیجا ہے ۔ اور جس کا حکم ہم ابراہیمؑ اور موسٰیؑ اور عیسٰیؑ کو دے چکے ہیں ۔ (وہ یہی ہے) کہ تم (اِسی) دین پر قائم رہو ۔اور اس میں تفرقہ نہ ڈالو ۔ (توحید کی) یہی بات مشرکین کو بڑی گراں گزرتی ہے جس کی طرف (اے محمد صلی اللہ علیہ وسلم) آپۖ اؙنہیں دعوت دے رہے ہیں ۔ اللہ جسے چاہتا ہے اپنے (قُربِ خاص کے) لئے چُن لیتا ہے ۔ اور وہ اپنی طرف آنے) کا کا راستہ اؙسی کو دکھاتا ہے جو اؙس کی طرف قلبی رجوع کرئے

)اور وہ فرقوں میں نہیں بٹے تھے مگر جب ان کے پاس (کتاب کا) علم آگیا تو محض آپس کی ضد کی وجہ سے (ایک دوسرے کے مخالف ہو گئے) ۔ اور اگر آپۖ کے رب کی طرف سے ایک مقررہ وقت (کی مہلت) کا فرمان پہلے صادر نہ ہوا ہوتا تو ان کے درمیان فیصلہ کر دیا جاتا ۔ اور بے شک جو لوگ ان کے بعد کتاب کے وارث بنائے گئے وہ اس کی طرف سے بڑے اضطراب انگیز شک میں پڑے ہوئے ہیں

(جب حالات ایسے ہو چکے ہیں تو اے محمد صلی اللہ علیہ وسلم) آپۖ اسی (دین) کے لئے دعوت دیتے رہیں ۔ اور جیسے آپۖ کو حکم دیا گیا ہے (اؙسی پر) قائم رہیں ۔ اور ان (لوگوں) کی خواہشات کا اتباع نہ کریں ۔ اور فرما دیجئے ۔ کہ میں پر اؙس کتاب پر ایمان لایا جو اللہ نے نازل کی ۔ اور مجھے حکم دیا گیا ہے کہ میں تمہارے درمیان عدل و انصاف کروں ۔ اللہ ہمارا رب ہے اور تمہارا (بھی) رب ہے ۔ ہمارے لئے ہمارے اعمال ہیں اور تمہارے لئے تمہارے اعمال ۔ ہمارے اور تمہارے درمیان کوئی جھگڑا (بھی) نہیں ۔ الله (ایک روز) ہم سب کو جمع کرے گا اور اس کی طرف سب کو جاتا ہے

اور جو لوگ اللہ (کے دین کے بارے میں) اس کے قبول کر لینے کے بعد جھگڑتے ہیں ، اُن کی حجّت بازی اؙن کے رب کے نزدیک لَغو ہے اور اؙن پر (اللہ کا) غضب ہے اور اؙن کے لئے سخت عذاب ہے

اللہ وہی تو ہے جس نے حق کے ساتھ کتاب نازل فرمائی ۔ اور (عدل و انصاف کا) ترازو (بھی) اور آپ کو کس نے خبردار کیا ، شاید قیامت قریب ہی ہو

وہ لوگ جو اس (قیامت کے بارے) میں جلدی مچا رہے ہیں (درحقیقت) وہ اس پر ایمان نہیں رکھتے ۔ اور جو لوگ ایمان رکھتے ہیں وہ اس سے ڈرتے ہیں اور جانتے ہیں کہ اس کا وقوع پذیر ہونا حق ہے ۔ یاد رکھو جو لوگ قیامت کے بارے میں جھگڑا کرتے ہیں وہ پرلے درجے کی گمراہی میں ہیں

اللہ اپنے بندوں پر بہت لطف و کرم فرمانے والا ہے ۔ جسے چاہتا ہے رزق سے نوازتا ہے ۔ وہ بڑی قوت والا ، بڑی عزت والا ہے

جو کوئی آخرت کی کھیتی چاہتا ہے تو ہم (اپنے فضل کرم سے) اُسکی کھیتی کو اور بڑھا دیں گے ۔ اور جو کوئی دنیا کی کھیتی کا طلب گار ہوتا ہے (تو) ہم اُسے اس میں سے دے دیں گے۔ اور اس کا آخرت میں کوئی حصہ نہ ہوگا