Surah Al-Furqan

بہت ہی بابرکت ہے وہ ذات جس نے حق و باطل میں فرق کر دینے والی کتاب اپنے بندہِ (خاص محمد صلی الله علیہ وسلم) پر نازل فرمائی تاکہ وہ سارے جہان والوں کو (عذاب الٰہی سے) ڈرائے

وہ (ذاتِ باری تعالٰے کہ) اؙسی کے لئے ہے آسمانوں اور زمین کی بادشاہی ۔ اور جس نے نہ (اپنے لئے) کوئی اولاد بنائی ہے اور نہ بادشاہی میں کوئی اؙسکا شریک ہے ۔ اور جس نے ہر چیز کو پیدا کیا اور پھر اس کو ایک مقرر اندازے پر ٹھہرایا ہے

مگر (لوگوں کا حال یہ ہے کہ) اؙنہوں نے اُس کے سوا دوسرے معبود بنا لئے جو کسی چیز کو پیدا نہیں کرتے بلکے وہ خود مخلوق ہیں ۔ اور اپنے لئے بھی کسی نقصان اور نفع کا اختیار نہیں رکھتے ۔ اور وہ نہ موت پر کوئی اختیار رکھتے ہیں اور نہ زندگی پر اور نہ مَرے ہوؤں کو اُٹھانا اؙن کے اختیار میں ہے

اور جن لوگوں نے (نبیۖ کی) بات ماننے سے انکار کر دیا ہے وہ کہتے ہیں کہ یہ (فرقان) ایک من گھڑت چیز ہے ۔ جسے (اس شخص نے) خود ہی گھڑ لیا ہے اور کچھ دوسرے لوگوں نے اس کام میں اسکی مدد کی ہے ۔ یہ بڑا ظلم اور جھوٹ ہے جس پر (یہ لوگ) اؙتر آئے ہیں

اور (یہ بھی) کہتے ہیں کہ یہ پہلے لوگوں کے قِصّے کہانیاں ہیں جِسے (یہ شخص) نقل کراتا ہے اور پھر (یہ قصّے) اسے صبح و شام سنائے جاتے ہیں

(اے محمد صلی اللہ علیہ وسلم) اِنہیں فرما دیجئے ۔ کہ اس (فرقان) کو تو اُس (ہستی) نے نازل فرمایا ہے جو آسمانوں اور زمین کے راز جانتا ہے ۔ (تم جیسے کافروں کے لئے اور اس کی جگہ عذاب بھی نازل کر سکتا تھا مگر) حقیقت تو یہ ہے کہ وہ بڑا بخشنے والا رحم کرنے والا ہے

اور کہتے ہیں کہ یہ کیسا رسول ہے ؟ یہ تو (ہماری طرح) کھانا کھاتا ہے ۔ اور (اپنی ضروریات کے لئے) بازاروں میں چلتا پھرتا ہے ۔ اس کی طرف کوئی فرشتہ کیوں نہ اُتارا گیا ؟ کہ وہ اس کے ساتھ مل کر (نہ ماننے والوں کو) دھمکاتا

�ا اس کی طرف کوئی خزانہ اؙتار دیا جاتا ، یا اس کے پاس کوئی باغ ہی ہوتا جس سے یہ کھاتا پیتا ۔ اور ظالم لوگ (مسلمانوں سے) کہتے ہیں کہ تم تو ایک سِحر زدہ آدمی کے پیچھے لگ گئے ہو

دیکھو (اے میرے حبیبۖ) یہ تمہارے بارے میں کیسی کیسی باتیں بنا رہے ہیں ! پس یہ گمراہ ہو چکے ہیں ۔ سو یہ (ہدایت کا) کوئی راستہ نہیں پا سکتے

وہ (اللہ) بڑی برکت والا ہے ۔ اگر چاہے تو (اے حبیبۖ) آپۖ کے لئے اس سے (کہیں) بہتر (چیزیں) بنا دے (یعنی) باغات جن کے نیچے نہریں رواں دواں ہوں ۔ اور (ان میں) آپۖ کے لئے محلّات بنا دے (مگر نبوت و رسالت کے لئے یہ شرائط نہیں ہیں)

بلکہ (درحقیقت) اؙنہوں نے قیامت کو (بھی) جھٹلا دیا ہے ۔ اور ہم نے (ہر) اؙس شخص کے لئے جس نے (بھی) قیامت کو جھٹلایا (دوزخ کی) بھڑکتی ہوئی آگ تیار کر رکھی ہے

جب وہ (بھڑکتی ہوئی آگ) ان (منکروں) کو دوؙر کے مقام سے دیکھے گی تو (دیکھتے ہی بپھر جائے گی اور) یہ اس کے بپھرنے اور چنگھاڑنے (کی آواز) کو سنیں گے

اور جب وہ اس میں کسی تنگ جگہ سے (زنجیروں کے ساتھ) جکڑے ہوئے ڈالے جائیں گے اس وقت وہ (اپنی) موت کو پکاریں گے

(ان سے کہا جائے گا) آج ایک ہی موت کو نہ پکارو (بلکہ) بہت سی موتوں کو پکارو

ان سے پوچھو - (ذرا بتاؤ) کیا یہ (بھڑکتی ہوئی آگ) بہتر ہے یا وہ دائمی جنّت جس کا وعدہ پرہیزگاروں سے کیا گیا ہے ۔ یہ (جنّت) اُن کے اعمال کا صلہ اور (اُن کے سفر کی) آخری منزل ہوگی

اُن کے لئے اس (جنّت) میں وہ (سب کچھ میسّر) ہوگا جو وہ چاہیں گے ۔ (اس میں) ہمیشہ رہیں گے ۔ یہ آپۖ کے رب کے ذمے ایک وعدہ ہے جس کو ہر حال میں پورا کرنا ہے

اور (یہ اُس دن کا دھیان کریں) جس دن (آپّ کا رب) اِنہیں اکٹھا کرے گا ۔ اور اؙن کو بھی جنہیں یہ اللہ کے سوا پوجتے ہیں ۔ پھر اُن سے پوچھے گا کیا تم نے میرے ان بندوں کو گمراہ کیا تھا یا وہ (خود) ہی راہ سے بھٹک گئے تھے

وہ جواب دیں گے کہ پاک ہے تیری ذات ، ہمیں تو یہ بات (بھی) زیبا نہ تھی کہ ہم تیرے سوا دوسروں کو کارساز بنائیں ۔ (ہم بھلا انہیں تیرے غیر کی عبادت کا کیوں کہتے ! ہُوا یہ کہ) تُو نے (اے ہمارے رب) اِنہیں اور ان کے باپ دادا کو (خوب خوب) سامانِ زندگی دیا ۔ یہاں تک کہ وہ تیری یاد بھی بھلا بیٹھے اور (یُوں) وہ لوگ برباد ہو کر رہ گئے

پارہ نمبر

اور (اے محمد صلی اللہ علیہ وسلم) ہم نے آپۖ سے پہلے جو رسول بھی بھیجے وہ یقیناً کھانا بھی کھاتے تھے اور (حسبِ ضرورت) بازاروں میں بھی چلتے پھرتے تھے ۔ اور (ایے ایمان والو) ہم نے تمہیں ایک دوسرے کے لئے آزمائش بنا دیا ہے ۔ (تو بولو ان سب باتوں پر) صبر کرتے ہو ؟ ۔ (آپۖ مطمئن رہیں ایے محمد صلی اللہ علیہ وسلم یہ جو کچھ کر رہے ہیں) آپۖ کا رب سب دیکھ رہا ہے