Surah Al-Hijr

الف ، لام ، را ۔ یہ کتابِ (الٰہی) اور روشن قرآن کی آیات ہیں

وہ وقت بھی آئے گا جب یہ منکرین تمنّا کریں گے کہ کاش ہم (بھی) مسلمان ہوتے !

(اے نبی صلی اللہ علیہ وسلم غمگین نہ ہوں) اِنہیں چھوڑ دیجئے ۔ یہ کھائیں (پئیں) اور مزے کریں اور بُھلاوے میں ڈالے رکھے اُن کی (جھوٹی) امید - عنقریب اِنہیں معلوم ہو جائے گا (اپنا انجام)

�م نے (اس سے پہلے) جس بستی کو بھی ہلاک کیا اُس (کی ہلاکت) کے لئے ایک نوشتہ موجود تھا

کوئی بھی قوم اپنے وقتِ مقررہ سے نہ آگے بڑھ سکتی ہے نہ پیچھے ہٹ سکتی ہے

اور (یہ لوگ) کہتے ہیں : اے وہ شخص جس پر نصیحت (کی کتاب) اُتاری گئی ہے تُو تو ہے ہی دیوانہ

اگر تُو سچا ہے تو ہمارے پاس فرشتوں کو لے کیوں نہیں آتا ؟

(دیکھو) ہم فرشتوں کو صرف فیصلہءِ حق کے ساتھ اُتارتے ہیں اور (جب وہ عذاب دینے کے لئے اؙتارے جاتے ہیں تو) اؙس وقت کسی کو مہلت نہیں دی جاتی

(یہ منکر قرآن کا مذاق اُڑاتے ہیں ، آپۖ اطمینان رکھئے اے رسول صلی اللہ علیہ وسلم) بلاشبه یہ ذکر (یعنی قرآنِ حکیم) خُود ہم نے اؙتارا ہے اور ہم ہی اسکے نگہبان ہیں

(اے محمد صلی اللہ علیہ وسلم) ہم نے آپۖ سے پہلے بہت سی گزری ہوئی قوموں میں رسول بھیجے تھے

(اُن کا چلن بھی ایسا ہی تھا کہ) اُن کے پاس جو بھی رسول آیا اؙنہوں نے اسکا مذاق ہی اڑایا

اِسی طرح ہم اس (تمسخر اور طنز و مذاق) کو مجرموں کے دلوں میں داخل کر دیتے ہیں

(اس لئے) یہ لوگ اس (قرآن) پر ایمان نہیں لائیں گے اور پہلے (لوگوں) کا طریقہ بھی یہی رہا ہے

اگر ہم اؙن پر آسمان سے کوئی دروازہ کھول بھی دیتے اور وہ دن دھاڑے اس میں چڑھتے بھی رہتے

پھر بھی وہ یہی کہتے کہ ہماری نظریں باندھ دی گئی ہیں بلکہ ہم لوگوں پر جادو کر دیا گیا ہے

اور بے شک ہم نے آسمان میں بُرج بنائے اور اِس (خلائی کائنات) کو دیکھنے والوں کے لئے آراستہ کیا

اور ہر شیطان مردؙود سے اِنہیں محفوظ کر دیا

(کوئی شیطان ان میں راہ نہیں پاسکتا) مگر یہ کہ کچھ سُن گُن لے لے ۔ (اور جب وہ چوری چُھپے سننے کی کوشش کرتا ہے) تو ایک روشن (جلتا ہُوا) شعلہ اس کا پیچھا کرتا ہے

اور زمین کو ہم نے (گولائی کے باوجود) پھیلا دیا ۔ اور اس میں (محکم) پہاڑ جما دیئے ۔ اور ہم نے ہر نوع (کی نباتات) کو ٹھیک ٹھیک نپی تُلی مقدار کے ساتھ اُگایا

اور ہم نے اس میں تمہارے لئے بھی رزق کے سامان پیدا کر دیئے ۔ اور اُن (انسانوں ، جانوروں اور پرندوں) کے لئے بھی جنہیں تم روزی دینے والے نہیں ہو