Surah Al-Mumtahanah

اے لوگو جو ایمان لائے ہو ۔ تم میرے اور اپنے دشمنوں کو دوست نہ بناؤ ۔ تم اُن سے اظہار محبت کرتے ہو حالانکہ وہ اس (دین) حق کے منکر ہیں جو تمہارے پاس آیا ہے ۔ (اور اؙن کی روش یہ ہے کہ) وہ رسولۖ کو اور خود تمہیں صرف اس وجہ سے (تمہارے وطن مکہ سے) نکالتے ہیں کہ تم اللہ پر ایمان لائے ہو جو تمہارا رب ہے ۔ اگر تم میری راہ میں جہاد کرنے اور میری رضا و خوشنودی تلاش کرنے کے لئے نکلے ہو (تو پھر انہیں دوست نہ بناو) ۔ تم ان کی طرف بڑی رازداری سے محبت کا پیغام بھیجتے ہو ، حالانکہ میں خوب جانتا ہوں جو کچھو تم نے چھپا رکھا ہے اور جو کچھ تم نے ظاہر کیا ہے ۔ اور جو کوئی بھی تم میں سے ایسا کرے گا ، یقیناً وہ راہ راست سے بھٹک گیا

(اؙن کا روّیہ تو یہ ہے کہ) اگر وہ (کسی طرح) تم پر قابو پالیں تو وہ تمہارے (کھلے) دشمن ہوں گے ۔ اور تمہیں تکلیف دینے کے لئے اپنے ہاتھ (بھی) چلائیں گے اور اپنی زبانیں (بھی) ۔ وہ تو یہ چاہتے ہیں کر تم (کسی طرح) کافر ہو جاؤ

(یاد رکھو) روز قیامت نہ تمہاری رشتہ داریاں کام آئیں گی اور نہ تمہاری (کافر و مشرک) اولاد ۔ (اؙس دن اللہ) تمہارے درمیان مکمل جدائی ڈال دے گا (یعنی مومن جنت میں اور کافر دوزخ میں بھیج دیئے جائیں گے) ۔ اور اللہ تمہارے اعمال کا دیکھنے والا ہے

بےشک تمہارے لئے ابراہیم (علیہ السلام) اور اؙن کے ساتھیوں میں بہترین نمونہ موجود ہے ۔ جب اؙنہوں نے اپنی قوم (صاف صاف) کہہ دیا ۔ " ہم تم سے اور اؙن (بتّوں) سے جن کی تم اللہ کے سوا پوجا کرتے ہو قطعی طور پر بیزار ہیں ۔ ہم نے (تمہارے سب باطل عقائد کا) انکار کیا ہے ۔ اور ہمارے اور تمہارے درمیان ہمیشہ کے لئے عداوت اور بغض وعناد پیدا ہو چکا ہے ۔ یہاں تک کہ تم ایک اللہ پر ایمان لے آؤ ۔ مگر ابراہیمؑ کا اپنے (پرورش کرنے والے) باپ سے یہ کہنا کہ میں تمہارے لئے مغفرت کی درخواست ضرور کروں گا (اس سے مستشنی ہے) ۔ اور یہ کہ اللہ سے تمہارے لئے کچھ حاصل کر لینا (تمہارے کفر و شرک کے باعث) میرے اختیار میں نہیں ہے ۔(پھر وہ یہ دعا کر کے قوم سے الگ ہو گئے) اے ہمارے رب ! ہم نے تجھی پر بھروسہ کیا اور ہم نے تیری ہی طرف رجوع کیا اور تیری ہی طرف لوٹ کر آنا ہے

اے ہمارے رب ! تو ہمیں کافروں کے لئے وجہ آزمائش نہ بنا (ایسا نہ ہو کہ وہ ہم پر مسلطّ ہو جائیں) اور ہمیں بخش دے ۔ اس ہمارے رب بے شک تو ہی غالب بڑی حکمت والا ہے

انہی (لوگوں) کے طرز عمل میں تمہارے لئے اور ہر اُس شخص کے لئے بہترین نمونہ ہے جو اللہ (کے حضور حاضری) کی اور یوم آخرت کی امید رکھتا ہے اور جو روگردانی کرئے تو بے شک اللہ بے نیاز لائق حمد و ثنا ہے

عین ممکن ہے کہ اللہ تمہارے اور اُن میں سے بعض لوگوں کے درمیان جن سے تمہاری دشمنی ہے ، محبت ڈال دے ۔ اور اللہ اس پر قادر ہے ۔ اور الله (اپنی قدرت کے ساتھ) غفور بھی ہے اور رحیم بھی ہے

اللہ تمہیں اس بات سے نہیں روکتا کہ تم ان لوگوں کے ساتھ جنہوں نے دین (کے بارے) میں تم سے جنگ نہیں کی اور نہ تمہیں تمہارے گھروں سے نکالا ہے ، کہ تم ان سے نیکی اور انصاف کا برتاؤ کرو (ضرور کرو) ۔ بے شک الله عدل و انصاف کرنے والوں کو پسند فرماتا ہے

اللہ تو تمہیں صرف اُن لوگوں سے (دوستی کرنے سے) روکتا ہے ، جنہوں نے تم سے دین کے معاملے میں جنگ کی ۔ اور تمہیں تمہارے گھروں سے نکالا (یعنی جلا وطن کیا) اور تمہارے باہر نکالے جانے پر (تمہارے دشمنوں کی) مدد کی ۔ اور جو (لوگ) ان سے دوستی کریں گے تو وہی لوگ ظالم ہیں

اے لوگو جو ایمان لائے ہو جب مومن عورتیں ہجرت کر کے تمہارے پاس آ جائیں تو (ان کے مومن ہونے کی) اچھی طرح جانچ پڑتال کر لیا کرو ۔ اور اؙن کے ایمان (کی حقیقت) کو اللہ ہی بہتر جانتا ہے ۔ پھر اگر تمہیں معلوم ہو جائے کہ وہ مومن ہیں تو اؙنہیں کافروں کی طرف واپس نہ لوٹاؤ ۔ نہ وہ (مومن عورتیں) اؙن (کافروں) کے لئے حلال ہیں اور نہ وہ (کافر) ان (مومن عورتوں) کے لئے حلال ہیں ۔ اور اُن (کافروں) نے جو (مال مہر کی صورت میں اُن پر) خرچ کیا وہ اؙنہیں ادا کردو اور اُن سے نکاح کرنے میں تم پر کوئی گناہ نہیں جبکہ تم اؙن عورتوں کا مہر اؙنہیں ادا کر دو ۔ اور تم خود بھی کافر عورتوں کو اپنے نکاح میں نہ روکے رکھو ۔ اور تم (کافروں سے) وہ (مال) واپس مانگ لو جو تم نے (ان عورتوں پر مہر کی صورت میں) خرچ کیا تھا ۔ اور وہ (کافر بھی تم سے) وہ (مال) مانگ لیں جو اؙنہوں نے (اُن عورتوں پر مہر کی صورت میں) خرچ کیا تھا ۔ یہی اللہ کا حکم ھے ۔ اور وہ تمہارے درمیان فیصلہ فرما رہا ہے ۔ اور وہ اللہ خوب جاننے والا ، بڑی حکمت والا ہے

اور اگر تمہاری بیویوں میں سے کوئی تم سے بھاگ کر کافروں کی طرف چلی جائے پھر (جب) تمہارا (کافروں پر) غلبہ ہو جائے اور مال غنیمت پاؤ تو (اس میں سے) اُن لوگوں کو جن کی عورتیں چلی گئی تھیں ، اتنا (مال) ادا کر دو جتنا وہ (ان کے مہر میں) خرچ کر چکے تھے ۔ اور اُس الله کی ناراضی سے بچتے رہو جس پر تم ایمان رکھتے ہو

اے نبی (صلی اللہ علیہ وسلم) جب آپۖ کی خدمت میں مومن عورتیں اس بات پر بیعت کرنے کے لئے حاضر ہوں کہ وہ اللہ کے ساتھ کسی (چیز) کو شریک نہیں بنائیں گی اور چوری نہیں کریں گی اور بد کاری نہیں کریں گی اور اپنی اولاد کو قتل نہیں کریں گی ۔ اور اپنے ہاتھوں اور پاؤں سے کوئی جھوٹا بہتان گھڑ کر نہیں لائیں گی (یعنی اپنے شوہر کو دھوکا دیتے ہوئے کسی غیر کے بچے کو اپنے پیٹ سے جنا ہوا نہیں بتائیں گی) ۔ اور (کسی بھی) امر شریعت میں آپۖ کی نافرمانی نہیں کریں گی ۔ تو آپۖ ان سے بیعت لے لیا کریں اور ان کے حق میں اللہ سے دعائے مغفرت کیا کریں ۔ بے شک اللہ بڑا بخشنے والا ، رحم فرمانے والا ہے

اے لوگو جو ایمان لائے ہو ۔ اُن لوگوں کو دوست نہ بناؤ جن پر اللہ غضب ناک ہوا ہے ۔ بے شک وہ آخرت (کے ثواب) سے اسی طرح مایوس ہو چکے ہیں جس طرح قبروں میں پڑے ہوئے کافر مایوس ہو چکے ہیں (اللہ کی رحمت سے دُور)