Surah At-Tawbah

اللہ اور اؙس کے رسولۖ کی طرف سے اُن مشرکین کو صاف جواب ہے جن سے تم نے معاہدے کئے تھے

پس (اے مشرکو !) تم زمین میں چار ماہ اور چل پھر لو ۔ اور جان لو کہ تم اللہ کو ہرگز عاجز نہیں کر سکتے اور یہ بھی کہ اللہ (اپنے رسولۖ کا) انکار کرنے والوں کو رؙسوا کرکے رہے گا

(آج) حجِ اکبر کے دن اللہ اور اؙس کے رسولۖ کی طرف سے سب لوگوں کے لئے اطلاعِ عام ہَے کہ بے شک اللہ مشرکین سے بَریُ الزمّہ ہے اور اؙس کا رسولۖ بھی ۔ اب اگر تم (لوگ) توبہ کر لو تو یہ تمہارے لئے بہتر ہے ۔ اور اگر تم مہنہ پھیرو گے تو خوب جان لو کہ تم اللہ کو ہر گز عاجز کرنے والے نہیں ہو اور (ایے رسولۖ) انکار کرنے والوں کو درد ناک عذاب کی خوش خبری سنا دو

بجُز اُن مشرکین کے جن سے تم نے معاہدے کئے تھے پھر (ان کو پورا کرنے میں) وہ تمہارے ساتھ کچھ بھی کمی نہیں کرتے اور نہ تمہارے خلاف کسی کی مدد کرتے ہیں تو ایسے لوگوں کے ساتھ تم بھی مدتِ معاہدہ تک وفا کرو ۔بے شک اللہ (بد عہدی سے) بچنے والوں کو پسند کرتا ہے

پھر جب حُرمت والے مہینے گزر جائیں تو ان مشرکوں کو جہاں بھی پاؤ قتل کردو اور (اس مقصد کے لئے) انہیں پکڑو اور ان کا گھیراؤ کرو اور ہر گھات میں ان کی تاک میں بیٹھو ۔ پھر اگر وہ توبہ کر لیں اور (اسلام قبول کرکے) نماز قائم کر لیں اور زکوٰۃ دینے لگیں تو ان کا راستہ چھوڑ دو ۔ بے شک اللہ مغفرت کرنے والا ، رحم کرنے والا ہے

اور اگر مشرکین میں سے کوئی شخص آپۖ سے پناہ مانگے (اور آپۖ کے پاس آ کر اللہ کا کلام سننا چاہے) تو اؙسے پناہ دے دو یہاں تک کہ وہ اللہ کا کلام سُن لے ۔ پھر اؙسے جائےِ امن تک پہنچا دو ۔ یہ اِس لئے کہ یہ لوگ (حقیقتِ حال) سے واقف نہیں ہیں

اللہ اور اؙس کے رسولۖ کے ہاں اِن (عہد شکن) مشرکوں سے کوئی معاہدہ بھلا کیونکر باقی رہ سکتا ہے سوائے اُن لوگوں کے جن سے تم نے مسجدِ حرام کے پاس (حدیبیہ کے مقام پر) معاہدہ کیا تھا ، تو جب تک وہ تمہارے ساتھ سیدھے رہیں تم بھی اُن کے ساتھ سیدھے رہو (اسلئے کہ) بلا شبہ اللہ اُن لوگوں کو پسند کرتا ہے جو (بد عہدی سے) بچنے والے ہوں

(ان سے عہد کی پاسداری کی توقع) کیونکر ہو (ان کا حال تو یہ ہے کہ) اگر وہ تم پر غالب آجائیں تو تمہارے بارے میں نہ کسی رشتہ داری کا لحاظ کریں اور نہ کسی عہد کا ۔ وہ اپنے مہنہ کی باتوں سے تمہیں راضی کرنا چاہتے ہیں ۔ مگر اؙن کے دل (ان باتوں سے) انکار کرتے ہیں اور ان میں سے اکثر بدکردار ہیں

اؙنہوں نے اللہ کی آیات کے بدلے میں تھوڑی سی قیمت وصول کرلی پھر اللہ کے راستے میں دیوار بن کر کھڑے ہو گئے ۔ (اس طرح) بہت بُرے کرتُوت تھے جو یہ کرتے رہے

ما شاء اللہ

)سو اگر وہ توبہ کرلیں اور نماز قائم کریں اور زکوٰۃ ادا کریں تو تمہارے دینی بھائی ہیں اور ہم جاننے والوں کے لئے اپنی آیات کھول کر بیان کر دیتے ہیں

اور اگر وہ عہد کرنے کے بعد پھر اپنی قَسمیں توڑ دیں اور تمہارے دین میں طعنہ زَنی کریں تو تم کفر کے (ان) سرغنوں سے جنگ کرو ۔ حقیقت تو یہ ہے کہ ان کی قسموں کا کوئی اعتبار نہیں ۔ شائد کہ وہ (اپنی حرکتوں سے) باز آجائیں

(ایمان والو) کیا اب بھی ان لوگوں سے نہیں لڑو گے جنہوں نے اپنے قول و قرار توڑ دیئے اور رسول (صلی اللہ علیہ وسلم) کو جلا وطن کرنے کا ارادہ کیا اور (جنگ و جدل کی) ابتداء کرنے والے بھی وہی تھے ۔ کیا تم اُن سے ڈرتے ہو ؟ سو اللہ زیادہ حق دار ہے کہ اُس (کے ناراض ہونے سے) ڈرا جائے اگر تم مومن ہو !!

اُن سے جنگ کرو اللہ تمہارے ہا تھوں اُنہیں عذاب دے گا اور اُنہیں رؙسوا کرے گا اور ان کے مقابلے میں تمہاری مدد فرمائے گا اور اہلِ ایمان کے سینوں کو ٹھنڈا کرے گا

اور اؙن کے دلوں کی گھٹن دوؙر فرمائے گا اور جس پر چاہے گا اللہ توجہ فرمائے گا (تا کہ وہ توبہ کرلے) اور اللہ خوب جاننے والا ، حکمت والا ہے

کیا تم لوگوں نے یہ سمجھ رکھا ہے کہ (مصائب و مشکلات سے گزرے بغیر) یونہی چھوڑ دیئے جاؤ گے ؟ حالانکہ (ابھی) اللہ نے اُن لوگوں کو پر کھا ہی نہیں جنہوں نے تم میں سے جہاد کیا اور (جنہوں نے) اللہ کے سوا اور اؙس کے رسول (صلی اللہ علیہ وسلم) کے سوا اور اہلِ ایمان کے سوا کسی کو بھی محرمِ راز نہیں بنایا ۔ جو کچھ تم کرتے ہو اللہ اس سے باخبر ہے

مشرکین کے لئے یہ روا نہیں کہ وہ اللہ کی مسجدوں کو آباد کریں ۔ حالانکہ وہ خود اپنے اؙوپر کُفر کے گواہ ہیں ۔ یہ وہ لوگ ہیں جن کے اعمال (کفر و شرک کی وجہ سے) ضائع ہو چکے ۔ (اب) وہ ہمیشہ کے لئے (جہنم کی) آگ میں رہنے والے ہیں

اللہ کی مسجدیں تو صرف وہی آباد کر سکتا ہے جو اللہ پر اور یومِ آخرت پر ایمان لایا ہو اور اؙس نے نماز قائم کی ہو اور زکوٰۃ ادا کی ہو اور اللہ کے سوا کسی سے نہ ڈرتا ہو ۔ پس اُمید ہے کہ یہی لوگ ہدایت پانے والوں میں سے ہوں گے

کیا تم (لوگوں) نے حاجیوں کو پانی پلانے اور مسجدِ حرام کی آباد کاری کرنے کو اس شخص کے (اعمال کے) برابر ٹھہرا لیا ہے جو اللہ پر اور یومِ آخرت پر ایمان لے آیا اور اؙس نے اللہ کی راہ میں جہاد کیا ؟ اللہ کے نزدیک یہ دونوں برابر نہیں ہو سکتے اور اللہ ظالموں کی راہنمائی نہیں فرماتا

جو لوگ ایمان لائے اور جنہوں نے ہجرت کی اور اللہ کی راہ میں جان ومال سے جہاد کیا یہ (خوش نصیب) اللہ کے ہاں بہت بڑا درجہ رکھتے ہیں اور یہی لوگ مراد پانے والے ہیں