Surah Fatir

حقیقی تعریف اللہ ہی کے لئے ہے ۔ جو آسمانوں اور زمین کا پیدا کرنے والا ہے ۔ (اور) فرشتوں کو پیغام رساں بنانے والا ہے ۔ (ایسے فرشتے) جو دو دو اور تین تین اور چار چار پروں والے ہیں ۔ وہ اپنی مخلوق کی ساخت میں جیسا چاہتا ہے اضافہ فرماتا رہتا ہے ۔ بے شک اللہ ہر چیز پر قادر ہے

اللہ لوگوں کے لئے رحمت کا جو بھی دروازہ کھول دے تو کوئی اؙسے روکنے والا نہیں اور جو (اللہ) روک لے تو اس کے بعد کوئی اُسے چھوڑنے والا نہیں ۔ اور وہ غالب ہے بڑی حکمت والا

اے لوگو ! تم پر اللہ کے جو احسانات ہیں اُنہیں یاد رکھو ۔ کیا اللہ کے سوا اور کوئی خالق ہے جو تمہیں آسمان اور زمین سے روزی دے ؟ اؙس کے سوا کوئی معبود نہیں پس تم کہاں بہکے پھرتے ہو ؟

اور (اے نبی صلی اللہ علیہ وسلم) اگر یہ (لوگ) آپۖ کو جھٹلاتے ہیں (تو یہ کوئی نئی بات نہیں) ۔ آپۖ سے پہلے بھی کتنے ہی رسول جھٹلائے گئے ۔ اور سارے معاملات اللہ ہی کی طرف لوٹائے جاتے ہیں

لوگو ۔۔۔۔ اللہ کا وعدہ یقیناً برحق ہے ۔ لہذا دنیا کی زندگی تمہیں دھوکے میں نہ ڈالے اور نہ وہ بڑا دھوکے باز (شیطان) تمہیں اللہ کے بارے میں دھوکا دینے پائے

درحقیقت شیطان تمہارا دشمن ہے لہذا تم بھی اُسے اپنا دشمن ہی سمجھو ۔ وہ تو اپنے گروہ کو صرف اس لئے بلاتا ہے کہ وہ دوزخیوں میں شامل ہو جائیں

(سچی بات تو یہ ہے) کہ کافروں کے لئے سخت عذاب ہے ۔ اور جو لوگ ایمان لائے اور نیک اعمال کرتے رہے اُن کے لئے مغفرت اور بڑا اجر ہے

(کیسا گمراہ ہو گا وہ شخص ؟) جس کے لئے اسکا برا عمل خوش نما بنا دیا گیا ہو اور وہ اُسے اچھا سمجھ رہا ہو ۔ دراصل الله (اپنے اصول و قواعد کے مطابق) جسے چاہتا ہے گمراہ ٹھہراتا ہے اور جسے چاہتا ہے راہِ راست دکھا دیتا ہے ۔ پس (اے حبیبۖ) آپۖ کی جان اِن پر حسرت اور فرطِ غم میں نہ گُھلے ۔ بلا شبہ اللہ ان (کرتوتوں) سے پوری طرح باخبر ہے جو یہ کر رہے ہیں

اور وہ اللہ ہی تو ہے جو ہواؤں کو بھیجتا ہے ۔ پھر وہ بادل کو اُٹھا لاتی ہیں ۔ پھر ہم اس (بادل) کو بنجر بستی (زمین) کی طرف لے جاتے ہیں ۔ پھر اس زمین کو مُردہ ہو جانے کے اس (بارش) سے (سرسبزوشاداب کر کے) زندگی عطا کرتے ہیں ۔ اسی طرح (مُردوں کا) جی اُٹھنا ہوگا

جو کوئی عزت چاہتا ہے (اُسے معلوم ہونا چاہئیے کہ) عزت ساری کی ساری اللہ کے لئے ہے ۔ (اؙس کے ہاں) جو چیز اوپر چڑھتی ہے وہ پاکیزہ کلام ہے اور نیک عمل اُس کو اوپر چڑھاتا ہے ۔ (رہے) وہ لوگ جو بے ہودہ چالبازیاں کرتے ہیں اؙن کے لئے سخت عذاب ہے ۔ اُن کا مکر و فریب خود ہی غارت ہونے والا ہے

اور اللہ نے تمہیں مٹی سے پیدا فرمایا ، پھر پانی کی بوند سے پھر تمہیں جوڑے جوڑے بنایا (یعنی مرد اور عورت) ۔ اور کوئی مادہ حاملہ نہیں ہوتی اور نہ بچہ جنتی ہے مگر اؙس (اللہ) کو اسکا علم ہوتا ہے ۔ اور نہ کسی دراز عمر شخص کی عمر بڑھائی جاتی ہے اور نہ اؙسکی عمر کم کی جاتی ہے مگر (یہ سب کچھ) ایک کتاب میں لکھا ہوا ہے ۔ بےشک یہ اللہ پر بہت آسان ہے

اور پانی کے دو ذخیرے یکساں نہیں ہیں ۔ یہ (ایک) میٹھا ہے بہت شیریں (پیاس بجھانے والا) پینے میں خوشگوار ۔ اور یہ (دوسرا) سخت نمکین ، تلخ کھاری (حلق چھیل دینے والا) ۔ اور تم ہر ایک سے تازہ گوشت کھاتے ہو ۔ اور (پہننے کے لئے) زینت کا سامان نکالتے ہو ۔ اور تُو اس میں کشتیوں کو دیکھتا ہے جو (پانی کو) چیرتی چلی جا رہی ہیں ۔ تاکہ تم (بحری تجارت کے راستوں سے) اُس کا فضل تلاش کرو اور (یہ سب نوازشات اس لئے) تاکہ تم شکر گزار بنو

وہ رات کو دن میں داخل کرتا ہے اور دن کو رات میں داخل کرتا ہے اور اُس نے سورج اور چاند کو مسخّر کر رکھا ہے ۔ ہر کوئی ایک مقررہ معیاد تک حرکت پذیر ہے ۔ وہی الله (جس کے یہ سارے کام ہیں) تمہارا ربّ ہے ۔ اُسی کی بادشاہی ہے ۔ اور وہ (دوسرے) جنہیں تم اؙس کے سوا پکارتے ہو وہ تو کجھور کی گٹھلی کے باریک چھلکے کے (بھی) مالک نہیں ہیں

(اے مشرکو) اگر تم اؙنہیں پکارو تو وہ (بُت) تمہاری پکار نہیں سن سکتے ۔ اور اگر (بالفرض) وہ سن بھی لیں تو تمہیں جواب نہیں دے سکتے ۔ اور قیامت کے دن وہ تمہارے شرک کا بالکل انکار کردیں گے ۔ اور تجھے (اللہ) باخبر جیسا کوئی خبردار نہ کرے گا

اے لوگو ! تم سب اللہ کے محتاج ہو اور اللہ وہ ہے جو بے نیاز اور لائقِ حمد وثنا ہے

اگر وہ چاہے تو تم سب کو ہٹا دے اور (تمہاری جگہ) نئی مخلوق لے آئے

اور ایسا (کرنا) اللہ پر کچھ دؙشوار نہیں

اور کوئی بوجھ اُٹھانے والا کسی دوسرے کا بارِ (گناہ) نہ اُٹھا سکے گا ۔ اور کوئی بوجھ میں دبا ہوا (دوسرے کو) اپنا بوجھ بٹانے کے لئے بلائے گا تو اس سے کچھ شے بھی نہ اُٹھائی جا سکے گی ، چاہے وہ قریب ترین رشتہ دار ہی کیوں نہ ہو ۔ (اے نبی صلی اللہ علیہ و سلم) آپۖ صرف اؙنہی لوگوں کو متنبّہ کر سکتے ہیں جو بن دیکھے اپنے رب سے ڈرتے ہیں اور نماز قائم کرتے ہیں ۔ اور جو کوئی پاکیزگی اختیار کرتا ہے وہ اپنے ہی (بھلے کے) لئے اختیار کرتا ہے ۔ اور سب کو اللہ ہی کی طرف پلٹنا ہے

اور اندھا اور آنکھوں والا برابر نہیں ہیں

اور نہ یکساں ہیں) اندھیرے اور نور (اُجالے)