Surah Ar-Ra'd

الف لام میم را ۔ (اے رسول صلی اللہ علیہ وسلم) یہ کتابِ (الٰہی) کی آیات ہیں ۔ اور جو کچھ آپۖ کے ربّ کی طرف سے آپۖ پر نازل کیا گیا ہے وہ (سراسر) حق ہے ۔ لیکن (آپۖ کی قوم کے) اکثر لوگ مان نہیں رہے ہیں

وہ اللہ ہی تو ہے جس نے آسمانوں کو ستونوں کے بغیر (خلا میں) بلند فرمایا (جیسا کہ) تم دیکھ رہے ہو ۔ پھر وہ عرش پر متمکن ہُوا اور اُس نے آفتاب و ماہتاب کو ایک نظام کا پابند بنا دیا ۔ (اس سارے نظام میں) ہر ایک ، ایک مقررہ وقت کے لئے گردش کر رہا ہے ۔ وہی ہر کام کی تدبیر کرتا ہے ۔ (اور اپنی) نشانیوں کو کھول کھول کر بیان فرماتا ہے ۔ اس لئے کہ تم اپنے ربّ سے ملاقات کا یقین کر لو

اور وہی تو ہے (تمہارا معبودِ حقیقی) جس نے (گولائی کے باوجود) زمین کو پھیلا دیا اور اس میں پہاڑ گاڑھ دیئے اور ندیاں بہا دیں ۔ (اور اُسی نے) ہر قسم کے پھلوں میں (بھی) دو دو (جنسوں کے یعنی نر اور مادہ) جوڑے بنا دیئے ۔ (وہی) رات سے دن کو ڈھانپ دیتا ہے ۔ بے شک ان (حقیقتوں) میں غوروفکر کرنے والوں کے لئے بہت سی نشانیاں ہیں

اور (دیکھو) زمین میں الگ الگ خطّے (برِّ اعظم پائے جاتے) ہیں جو ایک دوسرے سے متّصل واقع ہیں ۔ انگوروں کے باغات ہیں اور (ہر طرح کی) فصل اور کجھور کے درخت ہیں جُڑے ہوئے تنوں والے اور (کچھ) الگ الگ ۔ ان (سب) کو ایک ہی پانی سے سیراب کیا جاتا ہے اور (اس کے باوجود) ہم ذائقے میں بعض (پھلوں) کو بعض پر فضیلت دیتے ہیں ۔ بے شک اس میں بھی اؙن لوگوں کے لئے بہت سی نشانیاں ہیں جو عقل سے کام لیتے ہیں

اور (اے سُننے والے) اگر تُو (ان کے تعصبّ پر) حیران ہوتا ہے تو حیرت انگیز ان کا یہ قول بھی ہے کہ کیا جب ہم (مَر کر) مٹی ہو جائیں گے تو کیا ہمیں نئے سرے سے (دوبارہ) پیدا کی جائے گا ؟ ۔ یہی (منکرینِ قیامت) وہ لوگ ہیں جنہوں نے اپنے رب کا انکار کیا اور انہی (بد نصیبوں) کی گردنوں میں طوق (پڑے) ہوں گے اور یہی لوگ جہنمی ہیں وہ اس میں ہمیشہ ( پڑے) رہیں گے

اور یہ (لوگ) عافیت سے پہلے آپۖ سے مصیبت (کے نزول) کا بڑی تیزی سے تقاضا کر رہے ہیں ۔ حالانکہ ان سے پہلے (جو لوگ اس روش پر چلے ) اؙن پر نزولِ عذاب کی کئی مثالیں گزر چکی ہیں ۔حقیقت تو یہ ہے کہ آپۖ کا ربّ ان (لوگوں) کی زیادتیوں کے باوجود بہت معاف کرنے والا ہے اور (اس کے ساتھ) یہ بھی حقیقت ہے کہ آپۖ کا ربّ سخت عذاب دینے والا (بھی) ہے

اور وہ لوگ جنہوں نے (آپۖ کی بات ماننے سے) انکار کر دیا ہے ، کہتے ہیں کہ اس (رسولۖ) پر اس کے رب کی طرف سے (عذاب کی) کوئی نشانی کیوں نہ اُتاری گئی ؟ (اے رسولۖ ، آپۖ انہیں بتائیں کہ یہ کام میرا نہیں ہے اس لئے کہ ) آپۖ تو صرف (نافرمانوں کو انجامِ بد سے) ڈرانے والے ہیں اور (دنیا کی) ہر قوم کے لئے ہادی و راہنما ہیں

اللہ (ہر مادہ کے بارے میں) جانتا ہے کہ وہ اپنے پیٹ میں کیا اُٹھائے پھرتی ہے اور جو رحموں کے اندر گھٹتا ہے اور جو بڑھتا ہے (الله اس سے بھی واقف ہے) اور اس کے ہاں ہر چیز کے لئے ایک مقدار مقرر ہے

وہ پوشیدہ اور ظاہر (ہر چیز) کا جاننے والا ہے ۔ وہ سب سے بڑا عالی مرتبہ ہے

(اؙس کے علم میں) سب یکساں ہیں ۔ تم میں سے وہ بھی جو آہستہ بات کرے اور اور جو بلند آواز سے (بات) کرے اور جو رات (کی تاریکی) میں چھپا ہُوا ہو اور جو دن (کی روشنی) میں چل پھر رہا ہو

اِس (انسان) کے لئے یکے بعد دیگرے آنے والے (فرشتے) ہیں جو اس کے آگے اور پیچھے اللہ کے حکم سے اُس کی نگہبانی کرتے ہیں ۔ بے شک اللہ کسی قوم کی حالت نہیں بدلتا جب تک وہ خود اپنے آپ کو نہیں بدلتی اور جب اللہ کسی قوم کی شامت لانے کا ارادہ کر لیتا ہے تو وہ کسی کے ٹالے نہیں ٹل سکتی اور نہ اللہ کے مقابل میں اُن کا کوئی مددگار ہو سکتا ہے

وہی تو ہے (تمہارا معبودِ حقیقی) جو تمہیں بجلی دکھاتا ہے ۔ (جسے دیکھ کر) تمہیں خوف (بھی) آتا ہے اور (اللہ کی رحمت کی) اُمید بھی بندھتی ہے اور (کبھی ہوا کے دوش پر پانی سے لدے ہوئے) بھاری بادل اٹھاتا ہے

اور (بادلوں کی) گرج اُس (خالقِ کائنات) کی حمد کے ساتھ تسبیح بیان کرتی ہے اور فرشتے بھی اُس کے خوف سے (لرزتے ہوئے اؙس کی تسبیح کرتے ہیں) ۔ اور وہ کڑکتی ہوئی بجلیاں بھیجتا ہے اور (بسا اوقات) اُنہیں جس پر چاہتا ہے (عین اس حالت میں) گرا دیتا ہے جبکہ وہ اللہ کے بارے میں جھگڑ رہے ہوتے ہیں ۔ فی الواقع اُس کی گرفت بڑی سخت ہے

اُسی کو پکارنا برحق ہے ۔ (رہے وہ معبودانِ باطلہ) جنہیں یہ لوگ اؙس (اللہ) کے سوا پکارتے ہیں وہ اُنہیں کچھ بھی جواب نہیں دےسکتے ۔ (اُنہیں پکارنا تو ایسا ہے) جیسے کوئی شخص اپنی دونوں ہتھیلیاں پانی کی طرف پھیلائے (بیٹھا ہو) تاکہ پانی اؙس کے منہہ تک پہنچ جائے ۔ حالانکہ وہ (پانی) اؙس تک پہنچنے والا نہیں اور (اسی طرح بتوں کے سامنے) ان منکروں کی پکار گمراہی (کے گڑھے) میں گرنے کے سوا اور کچھ نہیں

اور جو کوئی بھی آسمانوں اور زمین میں ہے سب اللہ ہی کو سجدہ کر رہے ہیں (بعض) برضا و رغبت اور بعض مجبوراً - اور صبح و شام اُن کے سائے بھی (سجدہ ریز ہیں)

(آئتِ السجده)اِن (کافروں) سے پوچھو ۔ آسمانوں اور زمین کا رب کون ہے ؟ (خود ہی) کہہ دیجئے ۔۔۔۔ اللہ ۔ (پھر ان سے) پوچھئے ۔ کیا پھر بھی تم نے اؙس (اللہ) کے سوا ایسے کارساز بنا رکھے ہیں جو خود اپنے لئے بھی کسی نفع اور نقصان کا اختیار نہیں رکھتے ۔ (پھر) آپۖ (ان سے دریافت) فرمائیے ۔ کیا اندھا اور آنکھوں والا برابر ہو سکتا ہے ؟ اور کیا تاریکیاں اور روشنی یکساں ہو سکتی ہیں ؟ (اور اگر ایسا نہیں تو) کیا ان کے ٹھہرائے ہوئے شریکوں نے بھی اللہ کی طرح کچھ پیدا کیا ہے کہ (اس کی وجہ سے) ان پر تخلیق کا معاملہ مشتبہ ہوگیا ہے ؟ ۔ فرما دیجئے (کہ بس عقل کو ہاتھ مارو) اللہ ہی چیز کا خالق ہے اور وہ یکتا ہے ، سب پر غالب ہے

اُس (اللہ) نے آسمان سے پانی اُتارا تو وادیاں اپنی (اپنی) گنجائش کے مطابق بہہ نکلیں ۔ پھر سیلاب (کی رَو) نے اؙبھرا ہوا جھاگ اٹھا لیا ۔ اور ان (دھاتوں) میں بھی جن کو زیور یا دوسرا سامان (وغیرہ) بنانے کے لئے پگھلاتے ہیں اس پر بھی ویسا ہی جھاگ اٹھتا ہے ۔ اس طرح الله حق و باطل کی (مثالیں) بیان کرتا ہے ۔ سو جھاگ تو (پانی والا ہو یا دھات والا سب) بے کار ہو کر رہ جاتا ہے ۔ اور البتہ جو کچھ انسانوں کے لئے فائدہ مند ہو وہ زمین میں باقی رہتا ہے ۔ اللہ اس طرح مثالیں بیان فرماتا ہے (تاکہ تم سمجھو)

ایسے لوگوں کے لئے جنہوں نے اپنے رب کی دعوت قبول کر لی ، بھلائی (ہی بھلائی) ہے ۔ اور جنہوں نے اِسے قبول نہ کیا اگر اُن کے پاس وہ سب کچھ ہو جو زمین میں ہے اور اس کے ساتھ اتنا اور بھی ہو ، سو وہ اِسے (عذاب سے نجات کے لئے) فدیہ دے ڈالیں (مگر نجات کہاں ؟) ۔ اِنہی لوگوں کا حساب بہت بُرا ہوگا اور ان کا ٹھکانا جہنم ہے اور وہ بہت بُرا ٹھکانا ہے

بھلا (یہ کس طرح ممکن ہے کہ) وہ (شخص) جو آپۖ کے رب (کی اس کتاب کو جو اُس) نے آپۖ پر نازل کی ہے حق جانتا ہے اور وہ شخص جو (اس حقیقت کی طرف سے) اندھا ہے ، ایک جیسے ہو سکتے ہیں ؟ بات یہی ہے کہ نصیحت تو دانشمند لوگ ہی قبول کیا کرتے ہیں

(اور اُن کا طرز عمل یہ ہوتا ہے کہ) وہ اللہ کے ساتھ کئے ہوئے عہد کو پورا کرتے ہیں اور قول و قرار کو توڑ نہیں ڈالتے