Surah Al-Mujadila

بے شک اللہ نے اُس (عورت) کی بات سُن لی ہَے جو (اے نبی صلی اللہ علیہ وسلم) آپۖ سے اپنے شوہر کے بارے میں تکرار کر رہی ہے ۔ اور (ساتھ ہی) اللہ سے (اپنے رنج و غم کا) شکوہ کئے جاتی ہے ، اور الله آپ دونوں کی گفتگو سُن رہا ہے ۔ بلا شبہ اللہ (سب کی باتیں) سننے والا (سب کچھ) دیکھنے والا ہے

تم میں سے جو لوگ اپنی بیویوں سے ظہار کر بیٹھتے ہیں (یعنی یہ کہہ دینا کہ تم مجھ پر میری ماں کی پُشت کی طرح ہو) تو (ایسا کہنے سے) اُن کی (بیویاں اُن کی) مائیں نہیں ہو جاتیں ۔ اؙن کی مائیں تو وہی ہیں جنہوں نے اُن کو جنا ہَے ۔ بے شک یہ لوگ سخت نا پسندیدہ اور جھوٹی بات کہتے ہیں ۔ اور حقیقت تو یہ ہے کہ اللہ بہت درگزر فرمانے والا ، بخشنے والا ہے

اور جو لوگ اپنی بیویوں سے ظہار کر بیٹھیں پھر جو (بات) اؙنہوں نے کہی ، اس سے پلٹنا چاہیں تو (اس کا کفارہ یہ ہے کہ خاوند) ایک غلام یا کنیز آزاد کرے ۔ اس سے قبل کہ وہ ایک دوسرے کو ہاتھ لگائیں ۔ یہ ہے وہ نصیحت جو تمہیں کی جا رہی ہے ۔ اور اللہ اؙن کاموں سے خوب آگاہ ہے جو تم کرتے ہو

پس (جو شخص غلام یا کنیز) نہ پائے تو وہ دو ماہ کے متواتر روزے رکھے ۔ قبل اس کے کہ وہ ایک دوسرے کو مس کریں ۔ پھر جو کوئی اس کی (بھی) طاقت نہ رکھے تو ساٹھ مسکینوں کو کھانا کھلانا (لازم ہے) ۔ یہ اس لئے کہ تم اللہ اور اؙس کے رسول (صلی اللہ علیہ وسلم) پر ایمان رکھو ۔ اور (یاد رکھو) یہ اللہ کی (مقرر کردہ) حدوؙد ہیں اور منکروں کے لئے درد ناک عذاب ہے

بے شک جو لوگ اللہ اور اؙس کے رسول (صلی اللہ علیہ وسلم) سے عداوت رکھتے ہیں وہ اِسی طرح ذلیل و خوار کر دیئے جائیں گے جس طرح اُن سے پہلے لوگ ذلیل و خوار کر دیئے گئے ۔ بے شک ہم نے وضاحت کے ساتھ آئیتں نازل کر دی ہیں اور نہ ماننے والوں کے لئے رسوا کر دینے والا عذاب ہے

(یاد کرو) جِس دن اللہ اِن سب کو (دوبارہ زندہ کر کے) اؙٹھائے گا ، پھر انہیں ان کے اعمال سے مطلع فرمائے گا ۔ اللہ نے (ان کا) کو سب کیا دھرا گن گن کر رکھا ہے حالانکہ وہ اسے بھول چکے ہیں ۔ اور اللہ پر چیز پر شاہد ہے

(اے انسان) کیا تو جانتا نہیں کہ بے شک اللہ کو اُن سب کا علم ہے جو کچھ آسمانوں میں ہے اور جو زمین میں ہے ۔ کبھی ایسا نہیں ہوتا کہ تین (آدمیوں) میں کوئی سرگوشی ہو اور اُن کے درمیان چوتھا اللہ نہ ہو، یا پانچ (آدمیوں) کی سرگوشی ہو اور اُن کے اندر چھٹا اللہ نہ ہو ، اور نہ اس سے کم (لوگوں) کی اور نہ زیادہ کی ، مگر وہ (ہمیشہ) اُن کے ساتھ ہوتا ہے جہاں کہیں بھی وہ ہوتے ہیں ۔ پھر وہ قیامت کے دن اؙنہیں آگاہ کر دے گا جو کرتوت وہ (دنیا ہیں) کرتے رہے ہیں ۔ بے شک اللہ ہر چیز کا علم رکھتا ہے

کیا آپۖ نے اُن لوگوں کو نہیں دیکھا جنہیں (اسلام کے خلاف) سرگوشیاں کرنے سے منع کیا گیا تھا ۔ پھر وہ لوگ وہی کام کئے جاتے ہیں جس سے وہ روکے گئے تھے ۔ اور وہ (چھپ چھپ کر آپس میں) گناہ ، زیادتی اور رسول (صلی اللہ علیہ وسلم) کی نافرمانی سے متعلق باتیں کرتے ہیں اور جب آپۖ کے پاس حاضر ہوتے ہیں تو آپۖ کو ان (نازیبا) الفاظ میں سلام کرتے ہیں جن سے اللہ نے آپۖ کو سلام نہیں فرمایا ۔ اور وہ اپنے دلوں میں کہتے ہیں کہ (اگر یہ رسول سچے ہیں تو) اللہ ہمیں ان (گستاخانہ باتوں) پر جو ہم کہتے ہیں عذاب کیوں نہیں دیتا ؟ ان کے لئے جہنم (کا عذاب) ہی کافی ہے ۔ اس میں داخل ہوں گے اور وہ بہت برا ٹھکانا ہے

اے ایمان والو ۔ جب تم آپس میں خُفیہ مشورہ کرو تو گناہ اور زیادتی اور رسول (کریم صلی اللہ علیہ وسلم) کی نافرمانی کا خُفیہ مشورہ نہ کیا کرو بلکہ نیکی اور تقویٰ کی بات سرگوشی کے انداریں کر لیا کرو ۔ اور اللہ کی ناراضی سے بچتے رہو جس کی طرف تم سب جمع کئے جاؤ گے

(کفار کی منفی اور تخریجی) سرگوشیاں تو شیطان کی طرف سے ہوتی ہیں ۔ تاکہ وہ ایمان لانے والوں کو رنجیدہ کرے ۔ حالانکہ وہ (شیطان) اللہ کے حکم کے بغیر ان (مومنوں) کو کوئی ضرر نہیں پہنچا سکتا ۔ اور ان (مومنوں) کو اللہ پر ہی بھروسہ رکھنا چاہئیے

اے لوگو جو ایمان لائے ہو جب تم سے کہا جائے کہ (آنے والوں کے لئے) اپنی مجلسوں میں کشادگی پیدا کر دو تو (جگہ) کشادہ کر دیا کرو ۔ اللہ تمہیں کشادگی عطا فرمائے گا ۔ اور جب تم سے کہا جائے کہ اُٹھ جاؤ تو اُٹھ جایا کرو ۔ جو (خوش نصیب) تم میں سے ایمان لائے اور جنہیں علم سے نوازا گیا ، اللہ ان لوگوں کے درجات بلند فرمائے گا ۔ اور جو کچھ تم کرتے ہو اللہ کو اسکی خبر ہے

اے ایمان والو جب تم رسولِ (مکرّم صلی اللہ علیہ وسلم) سے کوئی راز کی بات تنہائی میں کرنا چاہو تو سرگوشی سے پہلے کچھ صدقہ دے دیا کرو ۔ یہ عمل تمہارے لئے بہتر اور پاکیزہ تَر ہے ۔ پھر اگر (صدقہ دینے کے لئے) کچھ نہ پاؤ تو بے شک الله غفور (بھی ہے اور) رحیم (بھی)

کیا تم اس بات سے ڈر گئے کہ (بارگاہِ رسالت میں) رازداری کے ساتھ بات کرنے سے پہلے صدقات دینے ہوں گے ؟ پس جب تم ایسا نہ کر سکے تو اللہ نے تم پر نظر کرم فرمائی (یعنی یہ پابندی اُٹھا لی) ۔ تو (اب) نماز قائم کرتے رہو اور زکوٰۃ دیتے رہو اور اللہ اور اؙس کے رسول (صلی اللہ علیہ وسلم) کی اطاعت بجا لاتے رہو اور جو کچھ تم کرتے ہو اللہ اس سے باخبر ہے

کیا آپ نے اُن لوگوں کو نہیں دیکھا جنہوں نے ایک ایسی قوم کو دوست بنا لیا جن پر اللہ کا غضب ہُوا (یعنی یہود و منافقین کی دوستی) ۔ نہ وہ تم میں سے ہیں اور نہ اؙن میں سے ہیں ۔ یہ جان بُوجھ کر جھوٹی باتوں پر قَسمیں کھاتے ہیں

اللہ نے ان کے لئے سخت عذاب تیار کر رکھّا ہے ۔ بلاشبه بہت ہی بُرے کرتوت ہیں جو یہ کر رہے ہیں

انہوں نے اپنی (جھوٹی) قَسموں کو ڈھال بنا رکھا ہے ۔ (جن کی آڑ میں) وہ (دوسروں کو) الله کی راہ سے روکتے ہیں ۔ پس ان کے لئے ذلیل و خوار کر دینے والا عذاب ہے

اللہ (کے عذاب) سے بچانے میں نہ تو ان کا مال کچھ کام آئے گا اور یہ ہی ان کی اولاد (کچھ فائدہ دے گی) ۔ یہی لوگ اہلِ دوزخ ہیں ، وہ اس میں ہمیشہ رہنے والے ہیں

جس روز اللہ ان سب کو (دوبارہ زندہ کر کے) اؙٹھائے گا تو وہ اس کے سامنے (بھی) قسمیں کھائیں گے ، جیسے تمہارے سامنے قسمیں کھاتے ہیں ۔ اور وہ گمان کرتے ہیں کہ وہ کسی (اچھی) شَے (یعنی راه) پر ہیں ۔ خُوب جان لو کہ وہ پرلے درجے کے جھوٹے ہیں

(دراصل) شیطان اُن پر مسلّط ہو چکا ہے ۔ اور اُس نے اللہ کی یاد (اُن کے دلوں سے) بُھلا دی ہے ۔ یہی لوگ شیطان کا گروہ ہیں ۔ خبردار ۔ بےشک شیطانی گروہ کے لوگ ہی نقصان اٹھانے والے ہیں

بے شک جو لوگ اللہ اور اؙس کے رسول (صلی اللہ علیہ وسلم) سے عداوت رکھتے ہیں وہ یقیناً ذلیل ترین مخلوقات میں سے ہیں