Surah Al-Jumu'ah

اللہ کی تسبیح کر رہی ہے ہر وہ (چیز) جو آسمانوں میں ہے اور ہروه (چیز) جو زمین میں ہے ۔ جو (حقیقی) بادشاہ ہے ، (ہر طرح کے نقائص اور کمزوریوں سے) پاک ، سب پر غالب ، بڑی حکمت والا ہے

وبی (اللہ ربّ العزّت) ہے جس نے ان پڑھ لوگوں میں ایک رسول (یعنی محمدصلی اللہ علیہ وسلم) خود انہی میں سے مبعوث فرمایا ۔ جو اُن پر اؙس کی آیات پڑھ کر سناتا ہے ، اؙن کا تزکیہ نفس کرتا ہے اور اؙنہیں کتاب و حکمتکی تعلیم دیتا ہے ۔ حالانکہ وہ اس سے پہلے کھلی گمراہی میں تھے

(اس رسولۖ کی بعثت قیامت تک آنے والے) اُن دوسرے لوگوں کے لئے بھی ہے جو ابھی اؙن سے نہیں ملے ہیں ، اور وہ زبردست (قوتوں کا مالک) بڑی حکمت والا ہے

(نبی آخر الزّماں محمد مصطفٰے صلی اللہ علیہ وسلم کی بعثت اور حضورۖ کا فیض عام) یہ سب اللہ کا فضل ہے وہ جسے چاہتا ہے عطا فرماتا ہے ۔ اور اللہ صاحب فضل عظیم ہے

جن لوگوں کو تورات کا حامل بنایا گیا تھا مگر اؙنہوں نے اس کا بار نہ اٹھایا ۔ اُن کی مثال اُس گدھے کی سی ہے جس پر کتابیں لدی ہوئی ہوں ۔ (اس سے بھی زیادہ) بری مثال تو اُن لوگوں کی ہے جنہوں نے اللہ کی آیات کو جھٹلا دیا ہے ۔ اور اللہ (ایسے) ظالموں کی راہنمائی نہیں کرتا

فرما دیجئے (اے محمد صلی اللہ علیہ وسلم) اے لوگو جو یہودی بن گئے ہو اگر تم لوگ یہ دعوٰی کرتے ہو کہ سب لوگوں کو چھوڑ کر بس تم ہی اللہ کے چہیتے ہو تو موت کی تمنا کرو ، اگر تم (اپنے زعم میں) سچے ہو

اور (اے نبیۖ صادق) یہ لوگ کبھی بھی اس کی تمنّا نہ کریں گے ۔ اؙن کرتوتوں کی وجہ سے جو یہ اپنے ہاتھوں آگے بھیج چکے ہیں ۔ اور اللہ ان ظالوں کو خوب جانتا ہے

فرما دیجئے (اے حبیبۖ) جس موت سے تم بھاگتے ہو وہ تو تمہیں آ کر رہے گی ۔ پھر تمہیں لوٹا دیا جائے گا اؙس (ربّ) کی طرف جو ہر پوشیدہ اور ظاہر کا جاننے والا ہے ۔ سو وہ تمہیں آگاہ کر دے گا جو کچھ تم کرتے رہے ہو

اے ایمان والو ۔ جب جمعہ کے دن (جمعہ کی) نماز کے لئے اذان دی جائے تو فوراً اللہ کے ذکر (یعنی خطبہ و نماز) کی طرف تیزی سے چل پڑو اور خرید و فروخت چھوڑ دو ۔ یہ تمہارے لئے زیادہ بہتر ہے اگر تم (حقیقت) جان لو

پھر جب نماز پوری ہو جائے تو زمین میں پھیل جاؤ اور اللہ کا فضل (یعنی رزق حلال) تلاش کرو ۔ اور اللہ کو کثرت سے یاد کرتے رہو ۔ تاکہ تم فلاح پاؤ

اور (بعض لوگوں نے) جب تجارت یا کھیل تماشا ہوتے دیکھا تو اُس کی طرف بھاگ کھڑے ہوئے ۔ اور آپۖ کو (دوران خطبہ) کھڑا چھوڑ گئے ۔ (فرما دیجئے) کہ جو (نعمتیں) اللہ کے پاس ہیں وہ کھیل تماشے اور تجارت سے بہتر ہیں ۔ اور اللہ سب سے بہتر رزق دینے والا ہے