Surah Az-Zumar

اِس کتاب کا نزول اللہ کی طرف سے ہے جو غالب حکمت والا ہے

(اے محمد صلی اللہ علیہ وسلم) بے شک ہم نے (یہ) کتاب آپۖ کی طرف حق کے ساتھ نازل کی ہے ۔ تو آپۖ اللہ ہی کی عبادت کریں ، دین کو اُسی کے لئے خالص کرتے ہوئے

سُنیں ، حقِ عبادت خالصتاً اللہ ہی کے لئے ہے ۔ (رہے وہ لوگ) جنہوں نے اللہ کے سوا (اور) سرپرست بنا رکھے ہیں (جھوٹا جواز پیش کرتے ہوئے کہتے ہیں کہ) ہم ان کی پوجا صرف اس لئے کرتے ہیں کہ وہ ہمیں اللہ کا مقرّب بنا دیں گے ۔ یقیناً اللہ ان کے درمیان اُن (تمام باتوں) کا فیصلہ فرما دے گا جن میں وہ اختلاف کرتے ہیں ۔ بے شک اللہ کسی (ایسے شخص) کو ہدایت نہیں دیتا جو جھوٹا اور منکرِ حق ہو

اگر الله (اپنے لئے) اولاد بنانے کا ارادہ فرماتا تو اپنی مخلوق میں سے جِسے چاہتا منتخب فرما لیتا ۔ (لیکن) وہ پاک ہے (ایسی تمناؤں سے) ۔ وہی اللہ ہے جو یکتا ہے ، سب پر غالب

اؙس نے آسمانوں اور زمین کو صحیح تدبیر کے ساتھ پیدا فرمایا ۔ وہ رات کو دن پر لپیٹتا ہے اور دن کو رات پر لپیٹتا ہے ۔ اور اُسی نے سورج اور چاند کو (ایک نظام میں) مسخّر کر رکھا ہے ۔ ہر ایک مقررہ وقت کی حد تک (اپنے مدار میں) چلے جا رہا ہے ۔ خبردار ! وہی (نظامِ کائنات پر) غالب ، بڑا بخشنے والا ہے

(سوچو ذرا) اؙس نے تمہیں فرد واحد سے پیدا فرمایا ۔ پھر اسی سے اس کا جوڑا بنایا ۔ اور اؙسی (خالق حقیقی) نے تمہارے لئے مویشیوں میں سے آٹھ نر و مادہ پیدا کئے ۔ وہ تمہاری ماؤں کے رحموں میں ایک تخلیقی مرحلہ سے اگلے تخلیقی مرحلہ میں (تدریجا) تمہاری تشکیل کئے چلا جاتا ہے ۔ وہ (اس عمل کو) تین تاریک پردوں میں (مکمل فرماتا ہے) ۔ یہی اللہ تعالٰے (جس کے یہ کام ہیں) تمہارا ربّ ہے ۔ بادشاہی اُسی کی ہے ۔ اؙس کے سوا کوئی معبود (بھی) نہیں ۔ پھر (یہ تخلیقی حقائق جان لینے کے بعد بھی) تم کہاں بہکے پھرتے ہو ؟

اگر تم (منکر بن کر) ناشکری کرتے ہو تو بے شک اللہ تم سے بے نیاز ہے اور وہ اپنے بندوں کے لئے ناشکرگزاری کو پسند (بھی) نہیں کرتا اور اگر تم شکرگزاری کرو (تو) اُسے تمہارے لئے پسند فرماتا ہے ۔ اور کوئی بوجھ اؙٹھانے والا کسی دوسرے کا بوجھ نہیں اؙٹھائے گا ۔ پھر تمہیں اپنے رب کی طرف لوٹنا ہے ۔ پس وہ تمہیں اُن (کاموں) سے خبردار کر دے گا جو تم کرتے رہے تھے ۔ بلا شبہ وہ تو سینوں کی (پوشیدہ) باتوں کو بھی خوب جاننے والا ہے

اور جب انسان کو کوئی تکلیف پہنچتی ہے تو وہ اپنے رب کو دل سے رجوع کرتے ہوئے پکارتا ہے ۔ پھر جب (اللہ) اُسے اپنی طرف سے کوئی نعمت عطا کر دیتا ہے تو وہ اؙس (تکلیف) کو بھول جاتا ہے ۔ جس کے لئے وہ اس سے پہلے دعا کیا کرتا تھا اور اللہ کے ساتھ دوسرے (خداؤں کو) ہمسر ٹھہراتا ہے ۔ تاکہ (دوسرے لوگوں کو بھی) اؙس کی راہ سے بھٹکا دے ۔ (اے نبیِ کریم صلی اللہ علیہ وسلم) اس سے کہہ دیجئے ، کہ تھوڑا عرصہ اپنے کُفر سے لطف اُٹھا لے ۔ یقیناً تُو اُن لوگوں کے ساتھ آگ میں جائے گا ، جو دوزخی ہیں

بھلا (یہ مشرک بہتر ہے یا) وہ (مومن) جو مطیع و فرماں بردار بن کر رات کی گھڑیوں میں سجود و قیام کی حالت میں رہتا ہے ۔ آخرت سے ڈرتا رہتا ہے ۔ اور اپنے ربّ کی رحمت کی اؙمید لگائے رکھتا ہے ۔ فرما دیجئے (میرے حبیبۖ) کیا جاننے والے اور نہ جاننے والے برابر ہو سکتے ہیں ؟ حقیقت تو یہ ہے کہ عقل رکھنے والے ہی نصیحت قبول کرتے ہیں

(اے نبیِ مکرّم صلی اللہ علیہ وسلم میری طرف سے) فرمادیجئے ۔ " اے میرے بندو ! جو ایمان لائے ہو ، اپنے رب (کی ناراضی) سے بچو ۔ جن لوگوں نے اس دنیا میں نیک رویّہ اختیار کیا اُن کے لئے بھلائی ہے اور اللہ کی زمین بڑی وسیع ہے ، (دنیاوی مشکلات پر) صبر کرنے والوں کو تو اُن کا اجر بے حساب دیا جائے گا "

فرما دیجئے ۔ مجھے حکم دیا گیا ہے کہ دین کو اللہ کے لئے خالص کرکے اُسکی بندگی کروں

اور مجھے یہ (بھی) حکم دیا گیا ہے کہ میں سب سے پہلا مسلمان بنوں

(یہ بھی) فرما دیجئے کہ اگر مَیں اپنے رب کی نافرمانی کروں تو مجھے ایک بڑے دن کے عذاب کا خوف ہے

(ہاں اِن پر یہ بھی) واضح کر دیجئے ۔ " میں تو اپنے دین کو اللہ کے لئے خالص کر کے اُسی کی بندگی کرتا ہوں "

سو تم اللہ کے سوا جس جس کی پوجا کرنا چاہو کرتے رہو ۔۔۔۔ نیز فرما دیجئے ، اصل دیوالیے تو وہی ہیں جنہوں نے قیامت کے دن اپنے آپ کو اور اپنے اہل و عیال کو گھاٹے میں ڈال دیا ۔ یاد رکھو یہی کھلا نقصان ہے

اؙن (بدبختوں) کے لئے اُن کے اوپر (بھی) آگ کے سائبان بنے ہوں گے اور اؙن کے نیچے بھی آگ کے فرش ہوں گے ۔ یہ وہ عذاب ہے جس سے اللہ اپنے بندوں کو خوف دلاتا ہے ۔ پس اے میرے بندو (میرے غضب سے) بچو

اور جو لوگ شیطان کی بندگی سے بچے رہے اور اللہ کی طرف جھکے رہے اُن کے لئے خوشخبری ہے ۔ پس آپۖ میرے اؙن بندوں کو بشارت دے دیجئے

جو بات کو غور سے سنتے ہیں پھر اس کے بہتر پہلو کی اتباع کرتے ہیں ۔ یہی وہ لوگ ہیں جنہیں اللہ نے ہدایت عطا فرمائی ہے اور (حقیقت میں) یہی لوگ عقل و بصیرت والے ہیں

بھلا جس پر عذاب کا حکم واجب ہو چکا تو کیا آپۖ اؙس شخص کو بچا سکتے جو آگ میں (جا چکا) ہے

لیکن جو لوگ اپنے رب (کی ناراضی) سے بچتے رہے ، اُن کے لئے (جنت میں) اونچے اونچے محلّات ہوں گے جن کے اوپر بھی بالا خانے بنائے گئے ہوں گے ، ان (محلّات) کے دامن میں نہریں رواں ہوں گی ۔ یہ اللہ کا وعدہ ہے ، اللہ وعدے کی خلاف ورزی نہیں کرتا