Surah Al-Baqarah

شروع اللہ کے نام کے ساتھ جو بڑا مہربان نہایت رحم کرنے والا ہے ۔الف لام میم

یہ (وہ) کتاب ہے کہ اس میں (ذرا بھی) شک نہیں ۔ یہ ہدایت ہے (اللہ کی ناراضگی سے) بچنے والوں کے لیے

جو غیب پر ایمان لاتے ہیں اور نماز قائم کرتے ہیں اور جو رزق ہم نے اُن کو دیا اُس میں سے خرچ کرتے ہیں

اور وہ لوگ جو ایمان لاتے ہیں (اے رسولﷺ) اُس پر جو آپﷺ پر نازل کیا گیا اور جو آپﷺ سے پہلے نازل کیا گیا اور آخرت پربھی وہ یقین رکھتے ہیں

یہی لوگ اپنے رب کی طرف سے ہدایت پر ہیں اور یہی لوگ فلاح پانے والے ہیں

بے شک جن لوگوں نے کفر اختیار کر لیا ہے, برابر ہے اُن کے لئے (اے رسولۖ) چاہے آپۖ اؙنہیں (عذابؚ الٰہی) سے ڈرائیں یا نہ ڈرائیں وہ ایمان نہیں لائیں گے

الله نے اُن کے دلوں اور اُن کے کانوں پر مُہر لگا دی ہے اور اُن کی آنکھوں پر پردہ پڑ گیا ہے اور اُن کے لئے بڑا عذاب ہے

اور لوگوں میں سے (کچھ لوگ ایسے بھی ہیں) جو کہتے ہیں کہ ہم اللّه اور یومِ آخرت پر ایمان رکھتے ہیں ، حالانکہ وہ مومن نہیں ہیں

فریب دینا چاہتے ہیں وہ اللّه اور ایمان والوں کو مگر (در حقیقت) وہ اپنے آپ کو دھوکا دے رہے ہیں اور وہ نہیں سمجھتے

اُن کے دلوں میں (نفاق کی) ایک بیماری ہے جسے اللّه نے اور بڑھا دیا ہے اور اُن کے لئے درد ناک عذاب ہے کیونکہ وہ جھوٹ بولتے تھے

اور جب اُن سے کہا جاتا ہے کہ زمین میں فساد (دہشت گردی) نہ پھیلاؤ تو کہتے ہیں بلا شبہ ہم ہی تو اصلاح کرنے والے ہیں

خبردار ۔۔۔ ! وہی فسادی (دہشت گرد) ہیں لیکن وہ سمجھتے نہیں

اور جب اُن سے کہا جاتا ہے کہ ایمان لاؤ جیسے (اور) لوگ ایمان لائے ہیں تو کہتے ہیں کیا ہم اُن بے وقوفوں کی طرح ایمان لے آئیں ؟ یاد رکھو ! وہی احمق ہیں مگر وہ جانتے نہیں

اور جب وہ ایمان والوں سے ملتے ہیں تو کہتے ہیں ہم ایمان لے آئے ہیں ۔ اور جب وہ اپنے شیطانوں کے ساتھ علیحدگی میں ہوتے ہیں تو کہتے ہیں (حقیقت میں) ہم تمہارے ہی ساتھ ہیں ہم تو صرف (اُن کا) مذاق اُڑا رہے تھے

اللہ بھی اُن کے ساتھ مذاق کرتا ہے اور اُنہیں ڈھیل دیتا ہے تاکہ اپنی سرکشی میں بھٹکتے رہیں

یہی وہ لوگ ہیں جنہوں نے ہدایت کے بدلے گمراہی خرید لی ۔ مگر ان کی یہ تجارت نفع بخش نہیں ہے اور نہ ہی وہ ہدایت یافتہ ہیں

اُن کی مثال اُس شخص جیسی ہے جس نے (اندھیری رات میں) آگ روشن کی ۔ پس جب اُس نے سارے ماحول کو روشن کر دیا تو اللہ اُن کی روشنی کو لے گیا اور اُنہیں گُھپ اندھیروں میں چھوڑ دیا، کہ جن میں کچھ بھی نظر نہ آئے

یہ بہرے گونگے (اور) اندھے ہیں ۔ پس وہ رجوع نہیں کریں گے

یا پھر (جیسے) آسمان سے زور کا مینہ برس رہا ہو ۔ جس میں اندھیرے ، گرج اور چمک ہو ۔ یہ بجلی کی کڑک سن کر موت کے ڈر سے اپنے کانوں میں اُنگلیاں ٹھونس لیتے ہیں اور اللّه ان منکرینِ حق کو ہر طرف سے گھیرے ہوئے ہے

قریب ہے کہ بجلی کی چمک اُن کی بینائی سلب کر لے ۔ جب بھی روشنی ہوتی ہے تو یہ اس میں چل پڑتے ہیں اور جب اندھیرا چھا جاتا ہے ان پر تو ٹھہر جاتے ہیں اور اگر اللہ چاہتا تو اُن کی سماعت اور بصارت سلب کر لیتا ، یقیناً اللہ ہر چیز پر قادر ہے