Surah Ar-Rum

الف لام میم (حقیقی معانی اللہ اور رسول صلی اللہ علیہ وسلم بہتر جانتے ہیں)

اہلِ روم (فارس سے) مغلُوب ہوگئے

(عرب سے) قریب ترین سرزمین میں ، اور وہ اپنے مغلوب ہونے کے بعد عنقریب غالب آ جائیں گے

چند ہی سالوں میں (یعنی دس سال سے بھی کم عرصہ میں) حُکم تو اللہ ہی کا ہے ۔ پہلے (فارس سے مغلوب ہونے میں بھی) اور بعد (کے غلبہ روم میں) بھی اور اُس روز (اللہ کی بخشی ہوئی فتح پر) اہلِ ایمان خوشیاں منائیں گے

اللہ کی مدد سے ، وہ جس کی چاہتا ہے مدد فرماتا ہے اور وہی سب پر غالب ، رحم فرمانے والا ہے

(یہ تو) اللہ کا وعدہ ہے ۔ اللہ کبھی بھی اپنے وعدہ کی خلاف ورزی نہیں کرتا ۔ لیکن اکثر لوگ (اس حقیقت کو) نہیں جانتے

(لوگ) دنیا کی زندگی کا بس ظاہری پہلو جانتے ہیں اور آخرت (کی حقیقی زندگی) سے خود ہی غافل ہیں

کیا اؙنہوں نے کبھی اپنے آپ میں غور و فکر نہیں کیا کہ اللہ نے آسمانوں اور زمین کو اور جو کچھ ان کے درمیان ہے بَرحق اور مقررہ مدّت کے لئے ہی پیدا فرمایا ہے ۔ اور (وجہِ انکار بس یہی ہے کہ اِن میں سے) بہت سے لوگ اپنے رب کی ملاقات کے ہی منکر ہیں

کیا یہ لوگ کبھی زمین میں چلے پھرے نہیں کہ یہ اُن لوگوں کا انجام دیکھتے جو اِن سے پہلے گزر چکے ہیں ؟ ۔ وہ لوگ ان سے زیادہ طاقت ور تھے اور اُنہوں نے زمین میں خوب ہل چلایا تھا اور اُسے آباد کیا تھا ۔ اس سے کہیں بڑھ کر جس قدر اِنہوں نے زمین کو آباد کیا تھا ۔ پھر ان کے پاس ان کے رسول روشن نشانیاں لے کر آئے تھے ۔ پس نہ تھی اللہ کی شان کہ وہ ان پر ظلم کرتا بلکہ وہ خود ہی اپنے آپ پر ظلم کرتے تھے

آخر کار اُن کا انجام بہت بُرا ہُوا جنہوں نے بُرائی کی تھی ۔ اس لئے کہ اؙنہوں نے اللہ کی آیات کو جھٹلایا تھا اور ان کا مذاق اُڑایا کرتے تھے

اللہ ہی تخلیق کی ابتداء کرتا ہے پھر (فناہ کرنے کے بعد) دوبارہ پیدا کرے گا پھر اؙسی کی طرف لوٹائے جاؤ گے

اور جس دن قیادت کی گھڑی برپا ہو گی (اؙس دن) مجرم لوگ مایوسی کی اتھاہ گہرائیوں میں ڈوب جائیں گے

اُن کے (خود ساختہ) شریکوں میں سے کوئی (بھی) ان کا سفارشی نہ ہوگا اور وہ اپنے شریکوں کے منکر ہو جائیں گے

جس روز وه ساعت برپا ہوگی اس دن (تمام لوگ) الگ الگ گروہوں میں بٹ جائیں گے

پس جو لوگ ایمان لائے اور نیک عمل کرتے رہے وہ باغِ (جنت) میں خوش حال و مسرور ہوں گے

اور جنہوں نے کفر کیا اور ہماری آئیتوں کو اور آخرت کی ملاقات کو جھٹلایا وہ عذاب میں حاضر کئے جائیں گے

پس تم اللہ کی تسبیح کیا کرو جب تم شام کرو (مغرب اور عشاء کے وقت) اور جب تم صبح کرو (فجر کے وقت)

اور آسمانوں اور زمین میں حقیقی تعریف تو اُسی کی ہے ۔ اور (تم تسبیح کیا کرو) سہ پہر کو بھی (یعنی عصر کے وقت) اور جب تم دوپہر کرو (یعنی ظہر کے وقت)

وہ (خالقِ حقیقی ہی تو ہے جو) زندہ میں سے مُردے کو نکالتا ہے اور مُردے میں سے زندہ کو نکال لاتا ہے اور زمین کو اؙس کی موت (یعنی بنجر ہونے) کے بعد (بارش برساکر) زندگی بخشتا ہے اور یُونہی (قبروں سے) تمہیں نکالا جائے گا

اور اُس کی (قدرت کی) نشانیوں میں سے (ایک یہ) ہے کہ اُس نے تمہیں مٹی سے پیدا کیا ۔ پھر اب تم انسان ہو جو (زمین میں) پھیلتے چلے جا رہے ہو