Surah Al-Hadid

اللہ ہی کی تسبیح بیان کرتے ہیں جو بھی آسمانوں اور زمین میں ہیں ۔ وہی (سب پر) غالب ، بڑی حکمت والا ہے

آسمانوں اور زمین کی بادشاہت اؙسی کے لئے ہے ۔ وہی زندگی بخشتا ہے اور وہی موت دیتا ہے ۔ اور وہ ہر چیز پر پوری قدرت رکھتا ہے

وہی (سب سے) اوّل اور (سب سے) آخر ہے ، اور (اپنے قادر ہونے کی بِنا پر) ظاہر اور (اپنی ذات کی حیثیت سے) پوشیدہ (بھی) ہے ۔ اور وہ ہر چیز کا علم رکھتا ہَے

وہی ہے جس نے آسمانوں اور زمین کو چھ دنوں (یعنی ادوار) میں پیدا کیا ۔ پھر (اپنی شان کے مطابق) عرش پر جلوہ افروز ہُوا ۔ اُس کے علم میں ہے جو کچھ زمین میں داخل ہوتا ہے ۔ اور جو کچھ اس میں سے خارج ہوتا ہے ۔ اور جو کچھ آسمانی کروّں سے اؙترتا ہے اور جو کچھ ان میں چڑھتا ہَے ۔ اور وہ (ربِّ کائنات) تمہارے ساتھ ہوتا ہے تم جہاں کہیں بھی ہو ۔ اور اللہ جو کچھ تم کرتے ہو اس پر نظر رکھے ہوئے ہے

آسمانوں اور زمین کی بادشاہی اُسی کی ہے اور اؙسی کی طرف سارے امور لوٹائے جاتے ہیں

وہی (قادرِ مطلق ہے جو) رات کو دن میں داخل کرتا ہے اور دن کو رات میں داخل کرتا ہے ۔ اور وہ سینوں کی (پوشیدہ) باتوں کو بھی جانتا ہے

اللہ اور اؙس کے رسول (صلی اللہ علیہ وسلم) پر ایمان لاؤ اور اؙس (مال) میں سے خرچ کرو جس میں اُس نے تمہیں اپنا نائب (یعنی امین) بنایا ہے ۔ پس تم میں سے جو لوگ ایمان لائے اور (اللہ کی راہ میں) خرچ کیا اُن کے لئے بہت بڑا اجر ہے

اور تمہیں کیا ہو گیا ہے کہ تم اللہ پر ایمان نہیں لاتے حالانکہ رسول (صلی اللہ علیہ وسلم) تمہیں اپنے رب پر ایمان لانے کی دعوت دے رہے ہیں ۔ اور (خود اللہ نے) تم سے پختہ عہد لیا تھا ، اگر تم واقعی ماننے والے ہو

وہ (اللہ) ہی تو ہے جو اپنے (برگزیدہ) بندے پر واضح آیات نازل فرماتا ہے ۔ تاکہ تمہیں (کفر کے) اندھیروں سے نکال کر (ایمان کے) نُور کی طرف لے آئے اور حقیقت تو یہ ہے کہ اللہ تم پر نہایت شفیق اور نہایت مہربان ہے

(حال) آخر تمہیں کیا ہو گیا ہے کہ تم اللہ کی راہ میں خرچ نہیں کرتے ۔ حالانکہ آسمانوں اور زمین کی میراث الله ہی کے لئے ہے (تم تو صرف اس کے امین ہو) ۔ تم میں سے کوئی برابری نہیں کر سکتا اُن کی جنہوں نے فتح (مکّہ) سے پہلے (اللہ کی راہ میں مال) خرچ کیا اور (کافروں سے) جنگ کی ۔ اُن کا درجہ بہت بڑا ہے اُن سے جنہوں نے (فتح مکّہ کے) بعد میں مال خرچ کیا اور (کافروں سے) جنگ کی ۔ اگرچہ اللہ نے سب کے ساتھ بہت عمدہ وعدہ فرما رکھا ہے ۔ اللہ جو کچھ تم کرتے ہو اللہ اس سے مکمل با خبر ہے

کون ہے جو اللہ کو (اپنا مال) قرض حسنہ کے طور پر قرض دے ، اور اللہ اس کے لئے اس (کے مال) کو کئی گنا بڑھا دے ۔ اور اس کے لئے عزت و اکرام والا اجر ہے

(اے رسول کریم صلّی اللہ علیہ وسلم) جس روز آپۖ (اپنی اؙمت کے) مومن مَردوں اور مومن عورتوں کو دیکھیں گے کہ اؙن کا نور اؙن کے آگے اور اؙن کے دائیں جانب (ضوفشانی کرتے ہوئے) دوڑ رہا ہو گا ۔ (اؙن سے کہا جائے گا) آج تمہیں بشارت ہو کہ (تمہارے لئے ) جَنّتیں ہیں جن کے دامن میں نہریں رواں دواں ہیں ۔ (تم) ہمیشہ اس میں رہو گے ۔ یہی بہت بڑی کامیابی ہے

اُس روز منافق مَرد اور منافق عورتیں ایمان والوں سے کہیں گے : ذرا ہماری طرف بھی دیکھو ہم تمہارے نُور سے کچھ فائدہ اؙٹھا لیں ۔ اؙن سے کہا جائے گا ۔ پیچھے پلٹ جاؤ اور (وہاں کہیں) نُور تلاش کرو ۔ پھر اؙن کے درمیان ایک دیوار کھڑی کر دی جائے گی ۔ جس میں ایک دروازہ ہوگا ۔ اس کے اندر کی جانب رحمت ہوگی اور باہر کی جانب اُس طرف عذاب ہوگا

وہ اہلِ ایمان سے پکار پکار کر کہیں گے ۔ کیا (دنیا میں) ہم تمہارے ساتھ نہ تھے ؟ (مومن) جواب دیں گے ۔ کیوں نہیں ۔۔۔۔ !! لیکن تم نے اپنے آپ کو خود (منافقت کے) فتنوں میں ڈال لیا تھا ۔ اور تم (ہماری تباہی کے) منتظر رہتے تھے ۔ اور تم (نبوتِ محمدیۖ اور دینِ اسلام میں) شک کیا کرتے تھے ۔ اور جھوٹی توقعات تمہیں فریب دیتی رہیں ۔ یہاں تک کہ اللہ کا فیصلہ (یعنی موت کا بلاوا) آ گیا ۔ اور (سب سے بڑھ کر) یہ کہ تمہیں اللہ کے بارے میں دغا باز (شیطان) دھوکہ دیتا رہا

پس (اے منافقو !) آج کے دن تم سے کوئی فدیہ قبول نہیں کیا جائے گا اور نہ اُن لوگوں سے جنہوں نے (کُھلم کُھلا) کفر کیا تھا ۔ اور تم (سب) کا ٹھکانا آتشِ (جہنم) ہے ۔ وہی تمہاری رفیق ہے اور وہ بہت ہی بُرا ٹھکانہ ہے

کیا ایمان والوں کے لئے (ابھی) وہ وقت نہیں آیا کہ اُن کے دل اللہ کے ذکر سے جُھک جائیں اور اس حق کے لئے (بھی) جو نازل ہوا ہے ۔ اور وہ اُن لوگوں کی طرح نہ ہو جائیں جنہیں پہلے کتاب دی گئی تھی پھر ایک لمبی مدّت اؙن پر گزر گئی تو اُن کے دل سخت ہوگئے اور اُن میں (آج) بہت سے لوگ نا فرمان ہیں

خُوب جان لو کہ اللہ ہی زمین کو اس کی موت (یعنی خشک اور بنجر ہونے) کے بعد زندگی بخشتا ہے (یعنی بارش برسا کر سرسبز و شاداب کر دیتا ہے) اور بے شک ہم نے تمہارے لئے (اپنی) نشانیاں واضح کر دی ہیں ۔ تاکہ تم عقل سے کام لو

بے شک صدقہ و خیرات دینے والے مرد اور صدقہ و خیرات دینے والی عورتیں اور (وہ) جنہوں نے اللہ کو قرض حسنہ کے طور پر قرض دیا ، ان کو یقینا کئی گئی بڑھا کر دیا جائے گا اور اُن کے لئے کریمانہ اجر ہوگا

اور جو لوگ اللہ اور اؙس کے رسولوں پر ایمان لائے وہی (خوش نصیب) اپنے رب کے نزدیک صدّیق اور شہید ہیں ۔ اُن کے لئے (خصوصی) اجر اور (مخصوص) نور (بھی) ہے ۔ اور جو (بد نصیب) مُنکر ہو گئے اور ہماری آئیتوں کو جھٹلاتے رہے وہی لوگ دوزخی ہیں (دہکتی ہوئی آگ میں جلیں گے)

خُوب جان لو کہ دنیا کی زندگی محض کھیل اور تماشا ہے اور ظاہری ٹیپ ٹاپ اور آپس میں (حسب و نسب پر) اترانا ، اور ایک دوسرے پر مال و اولاد میں اضافے کی طلب ہے ۔ اس کی مثال ایسی ہے جیسے بارش ہوگئی کہ جس کی پیداوار کسانوں کو بھلی لگتی ہے ۔ پھر وہ خشک ہو جاتی ہے ۔ پھر تم اؙسے پک کر زرد ہوتا دیکھتے ہو پھر وہ ریزہ ریزہ ہو جاتی ہے اور آخرت میں (کافروں کے لئے) شدید عذاب ہے اور (ایمان والوں کے لئے) اللہ کی طرف سے مغفرت اور (اؙس کی) خوشنودی ہوگی اور دنیا کی زندگی تو بَس دھوکے کے سوا اور کچھ بھی نہیں