Surah As-Sajdah

الف لام میم (حقیقی معانی اللہ اور رسولۖ ہی بہتر جانتے ہیں)

اس کتاب کا نزول بلا شک و شبہ ربِّ العٰلمین کی طرف سے ہَے

کیا (کفار و مشرکین) یہ کہتے ہیں کہ اِس (کتاب) کو اِس (رسولۖ) نے خود گھڑا لیا ہے ؟ (نہیں) بلکہ یہ آپۖ کے رب کی طرف سے حق ہَے ۔ تاکہ آپۖ متنبہ کریں ایک (ایسی) قوم کو جس کے پاس آپّ سے پہلے کوئی ڈر سنانے والا نہیں آیا ۔ تاکہ وہ ہدایت پا جائیں

اللہ ہی ہے جس نے آسمانوں اور زمین کو اور جو کچھ ان کے درمیان ہے چھ دنوں میں پیدا فرمایا ۔ پھر (اپنی شان کے مطابق) عرش پر جلوہ افروز ہوا ۔ (اور یاد رکھو) نہیں ہے تمہارے لئے اُس کے سوا کوئی حامی و مدد گار اور نہ کوئی (اس کے آگے) سفارش کرنے والا ہے ۔ کیا تم اتنا بھی نہیں سمجھتے ؟

وہ آسمان سے زمین تک نظامِ اقتدار (یعنی دنیا کے تمام معاملات) کی تدبیر فرماتا ہے ۔ پھر اس (تدبیر کی رُوداد) اؙوپر اس کے حضور ایک ایسے دن میں جاتی ہے جس کی مقدار تمہارے شمار سے ایک ہزار سال ہے

وہی ہے غیب اور ظاہر کا جاننے والا ، سب پر غالب (اور) بہت رحم فرمانے والا

جو چیز بھی اؙس نے بنائی خوب ہی بنائی اور اؙس نے انسانی تخلیق کی ابتدا گارے سے کی

پھر اس کی نسل ایک سَت سے چلائی جو حقیر پانی کی طرح کا ہے

پھر اس (کے قد و قامت) کو درست فرمایا اور اس میں اپنی روح پھونک دی ۔ اور تمہارے لئے بنا دئیے (سننے کے لئے) کان اور (دیکھنے کے لئے) آنکھیں اور (سمجھنے سوچنے کے لئے) دل ۔ (ان نعمتوں کے ہوتے ہوئے بھی) تم لوگ کم ہی شکر بجا لاتے ہو

اور (یہ منکر) کہنے لگے جب ہم زمین میں ملیا میٹ ہو جائیں گے تو (کیا) ہم از سرِ نو پیدا کئے جائیں گے ۔ بلکہ (اندر کی بات یہ ہے کہ) وہ اپنے رب کی ملاقات ہی کے منکر ہیں

آپۖ فرما دیں ۔ کہ موت کا وہ فرشتہ جو تم پر مقررکیا گیا ہے تم کو پورے کا پورا قبضے میں لے لے گا ۔ پھر تم اپنے رب کی طرف لوٹائے جاؤ گے

اور اگر آپۖ دیکھیں کہ جب مجرم لوگ اپنے رب کے حضور سر جھکائے ہوں گے (تو کہیں گے) اے ہمارے رب ! ہم نے دیکھ لیا اور ہم نے سُن لیا ۔ اب ہمیں (دنیا میں) واپس بھیج دے تا کہ ہم نیک عمل کریں ۔ بے شک ہم یقین کرنے والے ہیں

(جواباً ارشاد ہوگا) اور اگر ہم چاہتے تو ہم ہر نفس کو اس کی ہدایت (از خود) عطا کر دیتے ۔ لیکن میری طرف سے یہ بات طے ہو چکی ہے کہ میں جہنم کو تمام (سرکش) جِنّوں اور (نافرمان) انسانوں سے ضرور بھر دوں گا

اَب (اس جرم کی سزا کا) مزا چکھو کہ تم نے اس دن کی ملاقات کو بھلا رکھا تھا ۔ (آج) ہم نے بھی تمہیں نظر انداز کر دیا ہے اور اب چکھو دائمی عذاب کو اؙن (کرتوتوں) کے کے بدلے میں جو تم کیا کرتے تھے

�ماری آیات پر تو وہ لوگ ایمان لاتے ہیں جنہیں جب اِن (آئتوں) کے ذریعے نصحیت کی جاتی ہے تو وہ سجدے میں گر پڑتے ہیں ۔ اور اپنے رب کی حمد کے ساتھ اُسکی تسبیح کرتے ہیں اور وہ تکبر (بھی) نہیں کرتے

اُن کے پہلو اؙن کی خَوابگاہوں (بِستروں) سے جُدا رہتے ہیں اور وہ (تہجّد کے وقت) اپنے رب کو خوف اور اؙمید (کی ملی جُلی کیفیت) سے پکارتے ہیں اور ہمارے عطا کردہ رزق میں سے (ہماری راہ میں) خرچ کرتے ہیں

پس کسی کو معلوم نہیں جو (کچھ اجرِ عظیم کی شکل میں) آنکھوں کی ٹھنڈک (کا سامان) اُن کے لئے چھپا کر رکھا ہے ۔ یہ اُن (نیک اعمال) کا بدلہ ہو گا جو وہ کرتے رہے تھے

بھلا وہ شخص جو صاحبِ ایمان ہو اؙس کی مثل ہو سکتا ہے جو نا فرمان ہو ؟ (نہیں) یہ (دونوں) برابر نہیں ہو سکتے

پس جو لوگ ایمان لائے ہیں اور نیک اعمال (بھی) کرتے رہے ان کے لئے باغات ہیں جن میں دائمی قیام گاہیں ہیں ۔ (اللہ کی طرف سے ان کی) ضیافت و مہمان نوازی ہے ، اُن (اعمال) کے بدلے میں جو وہ کرتے رہے ہیں

اور جو لوگ نا فرمان و بد کردار ہوئے اُن کا دائمی ٹھکانہ آگ ہے ۔ وہ جب کبھی اس سے نکل بھاگنے کا ارادہ کریں گے تو اُسی میں لوٹا دیئے جائیں گے اور اُن سے کہا جائے گا کہ اُس آگ کا عذاب چکھتے رہو جس کو تم جھٹلایا کرتے تھے