Surah Maryam

کاف ھا یا عین صاد (حقیقی معنی اللہ اور رسول صلی اللہ علیہ وسلم ہی بہتر جانتے ہیں)

(اے محمد صلی اللہ علیہ وسلم ) یہ تذکرہ ہے (اؙس) رحمت کا جو آپۖ کے رب نے اپنے بندے ﺰکریاؑ پر کی تھی

جب اُس نے اپنے رب کو چپکے چپکے پکارا تھا

عرض کیا ۔ اے پالنے والے ! میری ہڈیاں کمزور ہو گئی ہیں ۔ اور بڑھاپے (کی سفیدی) سے میرا سر بھڑک اؙٹھا ہے ۔ اور ایے پالنے والے ! میں تجھ سے مانگ کر کبھی محروم نہیں رہا

اور مجھے اپنے پیچھے اپنے رشتہ داروں سے اندیشہ ہے (کہ وہ دین کی نعمت ضائع نہ کر بیٹھیں) اور میری بیوی بھی بانجھ ہے ۔ تو مجھے اپنی طرف سے ایک وارث عطا فرما

جو میرا وارث (بھی) ہو اور آل یعقوب کی میراث بھی پائے ۔ اور اے میرے رب اُسے اپنا پسندیدہ (انسان) بنانا

(اِرشاد ہوا) اے ﺰکریاؑ ۔ ہم تجھے ایک لڑکے کی بشارت دیتے ہیں ۔ جس کا نام یحیٰؑ ہوگا ۔ ہم نے اس سے پہلے اس کا کوئی ہم نام بنایا ہی نہیں

(زکریاؑ نے) عرض کیا ۔ اے میرے رب ! میرے ہاں لڑکا کیسے ہو سکتا ہے جبکہ میری بیوی بانجھ ہے ۔ اور میں خود بڑھاپے کی حد تک پہنچ چکا ہوں

جواب آیا (حیران نہ ہو) ایسا ہی ہوگا ۔ تیرے رب کا ارشاد ہے کہ یہ میرے لئے بہت آسان ہے ۔ اور بے شک میں اس سے پہلے تجھے پیدا کر چکا ہوں جبکہ تُو کوئی چیز نہ تھا

(زکریاؑ نے) عرض کیا ۔ اے میرے رب میرے لئے کوئی نشانی مقرر فرما ۔ ارشاد ہُوا ۔ تمہاری نشانی یہ ہے کہ تم تین راتیں مسلسل لوگوں سے بات نہ کر سکو گے

پھر (ﺰکریاؑ) محراب سے نکل کر اپنی قوم کی طرف آئے تو ان کی طرف اشارہ کیا (اور سمجھایا) کہ تم صبح و شام (اللہ کی) تسبیح کرو

(یہ بشارت پوری ہوئی ، یحیٰؑ پیدا ہوئے اور جب وہ سنِ رُشد کو پہنچے تو فرمایا) ۔ اے یحیٰؑ (ہماری) کتاب (توریت) کو مضبوطی سے تھام لو ۔ اور ہم نے تو اؙنہیں بچپن ہی میں حکمت وبصیرت (حق و باطل میں فیصلہ کرنے کی صلاحیت) عطا فرمادی تھی

اور اُنہیں اپنی طرف سے سوزو گداز (یعنی رقّتِ قلب) اور ( ظاہر و باطن کی) پاکیزگی (سے بھی نوازا تھا) ۔ وہ بڑے پر ہیز گار تھے

اور وہ والدین کے ساتھ بھلائی کرنے والے (تھے) اور (عام جوانوں کی طرح) سرکش و نافرمان بھی نہ تھے

اور سلام ہو یحیٰؑ پر جس دن وہ پیدا ہوئے اور جس دن اُن کی وفات ہوگی اور جس دن اؙنہیں دوبارہ اُٹھایا جائے گا

اور (اے محمد صلی اللہ علیہ وسلم اب) آپۖ اِس کتاب (یعنی قرآنِ مجید) میں مریم (علیہا السلام) کا تذکرہ بھی کر دیجئے ۔ جب وہ اپنے گھر والوں سے الگ ہو کر (بیت المقدس کے) مشرق کی طرف گوشہ نشین ہو گئی تھیں

پس اِس نے اُن کی طرف ایک پردہ لٹکا لیا ۔ پھر (اس حالت میں) ہم نے اؙس کی طرف اپنی روح (یعنی جبرئیلؑ) کو بھیجا جو اس کے سامنے ایک پورے انسان کی شکل میں نمودار ہو گیا

(مریمؑ اُسے دیکھتے ہی) بول اُٹھی ۔ اگر تُو (کوئی) خدا ترس آدمی ہے تو مَیں تجھ سے رحمٰن کی پناہ مانگتی ہوں

اُس نے کہا ۔ " میں تمہارے رب کا بھیجا ہُوا ہوں (اور اس لئے بھیجا گیا ہوں) تاکہ تمہیں ایک پاکیزہ فرزند عطا کروں "

(مریمؑ نے حیرت سے) کہا ۔ " میرے ہاں لڑکا کیسے ہو سکتا ہے جبکہ مجھے کسی بَشر نے چُھوا تک نہیں ۔ اور میں کوئی بدکار (عورت) بھی نہیں "